Black Season

Ang Sabi ni Juan:

Black Season

Ang sabi ni Juan sa panahon daw po ngayon

Na ang tao’y abala sa paglilimayon

Materyal na mga bagay ang pinapanginoon

Na dulot ng salaping kanilang ginugugol

Habang umuunlad modernong teknolohiya

Iba’t ibang gadget mabibili’t makukuha

Ngunit merong bagay na nalimutan yata

At ito’y ang mga taong sa kalikasa'y sumisira

Ang pagbabago ng klima sa ating panahon

Ang sanhi ng kalamidad sa iba’t ibang nasyon

Ayon sa nagsusuri, bigyan ito ng atensiyon

Ng gobyerno at ng tao, sama-sama, tulong-tulong

Ngunit kakaunti ang tumugon dito

Nakararaming mamamayan matitigas ang ulo

Maging namumuno’t umuugit sa gobyerno

Ay naging pabaya po’t ‘di ito sineryoso

Nagtatapon ng basura, kung saan sang dako

Sa dagat, sa lawa, sa ilog at estero

Ang mga kagubatan naman target ng kaingero

At mga residenteng, pag-uuling ang negosyo

Ang ating kabundukan patuloy ding pinapanot

Ng mga nagto-troso’t sa kagubatan ay salot

Ganoon din ang nagmiminang, lupa ang kinukutkot

Kaya ‘pag umulan, putik na pong umaagos

Ang “flash flood” sa Cagayan at Iligan City

Ay katulad ng sa Ormoc na naging history

Ang sanhi kung bakit, malaon nang nasuri

Pero hanggang ngayon nauulit pa’t nangyayari

Ito’y dahil sa pinunong sa lalawiga’y sumasakop

At gobyernong nagpabaya’t tungkulin ay nililimot

Sila rin po ang kapural, nagbibigay pahintulot

Na ang yaman nating likas, “gahasain” ng balakyot

Sa ngayon ay nagluluksa marami nating kababayan

Na sinalanta po ni “Sendong” na nagbuhos ng ulan

Sa dami ng nabiktima’t nagbuwis ng buhay

Ito ay bangungot ding mahirap malimutan

Sa halip na magsaya sa season ng kagalakan

Ang tangi pong magagawa ni Malaya at ni Juan

Tumulong sa nabiktima’t panalangin ay i-alay

Sa “black season” na itong si Sendong ang nag-iwan

Malayang Isip

Dimasalang, Philippines

December 19, 2011