The Court of Last Resort

Ang Sabi ni Juan:

The Court of Last Resort

Ang sabi ni Juan, sila rin dapat ang sisihin

Kung Korte Suprema, target ngayong atakihin

Ito’y dahil sa desisyong sa kanila rin nanggaling

Na umani ng kritisismo dahil tila paling-paling

Ang Korte Suprema, isa nating institusyon

Na sa ating gobyerno, haligi at pundasyon

Kung wala po ang “high court” batas nati’y ‘di gugulong

Dahil walang nasa “tore” na dito po ay hahatol

“The court of last resort” tawag sa Korte Suprema

Dahil kasong inapila, sa kanila pumupunta

Ang mga natalo’t, nawalan na ng pag-asa

Sa kanila tumatakbo, bilang “huling baraha”

Ngunit sa kaso ng FASAP, tila sila ay nasilat

“Nagbigay-bawi” sa desisyong, kanila pong inilabas

Ito po ang pinupuna’t gumawa ng alingasngas

Nakasira sa institusyong, sila po ang nag-iingat

Komento ni Mandy, hindi nga raw kagandahan

Sa desisyon ng Supreme Court, nagyari ay kapalpakan

Lalo’t ito’y ginawa lang nang sila raw ay sulatan

Ng kilalang abugado’t, sa batas ay kahusayan

Ang isip ng tao, ‘di raw pwedeng ‘di maglaro

Lalo’t itong kaso, malaki po’t sensitibo

Naglalaba’y “capitalist”, at sinibak na “empleado”

At ang masang nanonood hindi naman mga bobo

Ang sabi ni Juan, ano raw ba talaga kuya?

Ang desisyong bigay-bawi ng Korte Suprema

Marami pong mamamayan ang dito ay nagtataka

Ito raw ba’y isang “wisdom” o gawa ng mga “tanga”

Malayang Isip

Dimasalang, Philippines

October 12, 2011