Photo Op

Ang Sabi ni Juan:

Photo Op

Ang sabi ni Juan, sa bansang may kalamidad

Mga taong apektado’y dumaranas po ng hirap

Ang isa sa naiisip at kanilang hinahanap

Ang lider na sasandiga’t may puso na lumilingap

Nang si PNoy ay maluklok sa pagka-pangulo

Marami ang umaasang, magiting siyang kabalyero

Paghanga ay nadagdagan nang humarap siya sa tao

At sabihin sa talumpating “kayo ang Boss ko”

Ngunit ngayon ay nalantad kung sino si PNoy

At sino ang Bosing na kanyang tinutukoy

Sa gitna ng kalamidad na ang tao’y nananaghoy

Tila siya’y nagkukubli’t paos din po ang pagkahol

Depensa ng palasyo, si PNoy ang kumukumpas

Sa pagkilos ng alagad niya’y, siya po ang nag-atas

Kung ‘di man daw nakikita, si PNoy ay umiiwas

Sa “photo-op” ay allergic kaya hindi lumalabas

Komento ni Mandy, sobra daw sa kababawan

Ang ginamit na “alibi” ng presidenteng naturingan

Ang sabad ni Kiko, dapat nga lang s’yang pulaan

At anihin ang imaheng, hindi nga po kagandahan

Siste pa ni Kiko, si PNoy daw kung mag-react

Ay kapag na-criticize na ng mga “pakakak”

Kaya nang maglibot siya at sa tao ay lumantad

Tila pilit lang daw ito’t may bahid ng pagka-huwad

Ang wika ni Mandy pangit daw pong halimbawa

Ipinakita ni PNoy nang si “Pedring” ay magwala

At salantain ang lalawigang pinalubog po sa baha

Sa katuwirang sa photo op ‘di raw mahilig ang mama

Ang payo ni Juan huwag na daw magpa-impress

Ang ating presidenteng sa photo-of, ay ‘di sabik

Mga tao’y lalo lamang, sa kanya ay maiinis

Kaya ito’y hindi rason ng pangulong merong bait

Malayang Isip

Dimasalang, Philippines

October 5, 2011