All Out War

Ang Sabi ni Juan:

All Out War

Ang sabi ni Juan siya raw po’y naiiling

Sa MILF peace talks at sa gobyerno natin

Sa mahabang dekada raw, wala namang nararating

Kung hindi kamatayan ng kasundaluhan natin

Labing siyam pong kawal, pinatay sa Basilan

Habang tumutupad lamang sa tungkuling iniatang

Ang mga pumaslang po, MILF rebel na kalaban

Na nagsasabing “teritoryo” daw nila, ang lupang niyapakan

Si Mandy na Pilipino’t sa Pilipinas isinilang

Agad na naghimagsik, ang puso n’ya’t kalooban

Diyata’t sa bansa natin, may lupa nang nahiwalay

At teritoryong inangkin na ng rebeldeng kriminal?

Ang wika ni Mandy, na-missed tuloy n’ya si Erap

Sa pagiging “macho” nito kapag MILF ang kaharap

Ganoon din daw sa prinsipyong kanya noong tinutupad

Na wala raw teritoryong, sa Pilipinas ay mapipilas

Noong si Erap ang Presidente, siya po ay nagdeklara

Nang isang “all out war” at humanda sa giyera

Sa layuning Camp Abu Bakar, na teritoryo daw nila

Mabawi at patunayang ito’y ating makukuha

Mga hambog na MILF, natameme sa pagkabigla

Nagkanya-kanyang tago, sa nilusob nilang lungga

Ngunit sa kasamaang palad nang si Erap ay mawala

Nagbalik ang kayabangan ng MILF sa pag-ngawa

Presidenteng humalili, babae po’t “walang bayag”

Polisiya ni Erap kagyat din pong binaliktad

Sa palalong MILF nakipag-daop po ng palad

At teritoryong inaangkin, may basbas po ng pagpayag

Ito naman ang minana ni Presidente Aquino

Na ang nais ay “honeymoon” sa rebeldeng mapanggulo

Habang sila’y nagtatalik, ang MILF po na tuso

Kung patayin ang sundalo, “pinupugot pa ang ulo”

Kung ang gobyerno natin, sa MILF lang ay “duwag”

At walang kakayahang batas nati’y ipatupad

Sa teritoryong inaangkin, ‘di rin ito pumapalag

Sa “Spratly” pa kayang, higante na ang kaharap?

Ang bayan ay sawa na sa peace talk na walang ending

Dahil ang nais ng MILF, bansa natin ay tapyasin

Kung ganitong “kaulayaw” at inyo po na “kasiping”

Kayo po ba ay payag pang “pabola sa mga taksil?”

Ang payo ni Juan sa gobyernong nakaupo

“Political will” ang pairalin sa pakikitungo

Kung kalaban ay “traydor” at sobra sa pagka-tuso

Huwag namang basta na lang ang ulo n’yo’y iyuyuko

Sa naganap na pagpaslang, pagbayarin ang salarin

Sa bisa ng ating batas, silang lahat ay lambatin

Teritoryong inaangkin, puwersahin din na bawiin

Dahil ito’y ‘di po “pases” upang hindi na usigin

@Malayang Isip

Dimasalang, Bulacan

October 19, 2011