All Out Justice?

Ang Sabi ni Juan:

All Out Justice?

Ang sabi ni Juan, kapag pinag-usapan ang giyera

Ito po’y hindi biro kung kalaba’y ibang bansa

Hindi rin daw ito basta, idinedeklara

Dahil apektado po dito, ang atin pong soberenya

Ngunit kung ang kalaban po’y mga “rebeldeng kriminal”

Walang respeto’t, walang batas, sundalo po’y pinapatay

At may bahagi pa sa Mindanao, teritoryong kinakamkam

Ang tugisin daw po sila, “hindi giyerang katawagan”

Ito po ay nasa batas at tungkulin ng gobyerno

Na dapat ay ipatupad, na wala ring sinasanto

Pag-abandona dito ni PNoy, napaka-peligroso

Sa ating kasundaluhan, lilikha ng “disgusto”

Sa ganitong polisiya, simbaha’y huwag ring ihahalo

Hindi dapat tinatanong o kinukunan po ng kuro

Tiyak lang pong isasagot “kapag pinukol daw ng bato,

tinapay po ang ibalik” sa pumatay sa sundalo

Function ito ng gobyerno, na ‘di pinapangyari

Ang presidente po natin, sundalo muna ang sinisi

Sa halip po na ipahabol nang kriminal ay mahuli

"Peace talk" ang bukang-bibig at may “truce” pang sinasabi

Tila ang nais ni PNoy habang nakikipag-chat

Mga kalabang rebelde lang, ang puwede na rumatrat

At ang ating Armed Forces, “kalapati po ang hawak”

Hindi maaaring gumanti, kapag MILF ay nang-upak

Pero sa dami ng batikos na si PNoy ay pinupuna

Ang pangulo po natin, nagsalita na sa media

“All out justice” raw po, ninanais niya

Kaya pagtugis sa kriminal, iniutos na’t ginagawa

Ang Sibugay, Zamboanga, kanila na pong kinakanyon

Pero sa Al Barka, Basilan tila gobyerno’y mahinahon

Ang mga rebelde po na dito ay nagkakanlong

Ang pumatay ng labing-siyam at sundalong nakaburol

Ang sabi ni Juan kapag MILF daw sana ang kaharap

“Position of strength” ang dapat lang na itapat

Obserbasyon ni Juan, rebelde ang mas may “angas”

Kaya kasundaluhan po natin, palagi ng tini-tigbak

Malayang Isip

Dimasalang, Philippines

October 24, 2011