Enemy of the State

Ang Sabi ni Juan:

Enemy of the State

Ang sabi ni Juan, may sarili siyang komentaryo

Sa napabalita pong limang milyong piso

Salapi pong ibinigay ni presidente Aquino

Sa pinuno ng MILF, nang sila ay magtagpo

Ito raw ay “commitment,” pag-amin ng palasyo

Na hindi raw naibigay nang nakalipas na gobyerno

Kanila lang tinutupad ang sa kasundua’y pangako

Sa MILF official na sa peace talk ay ka-chat po

Nakalaan daw po ito sa BMLI na paaralan

Na leadership at management ang pagsasanayan

Kapag daw po ang sub-state naging isang katuparan

Meron silang mga leader na maaasahan

Maganda raw ang layunin, kung ito ay hindi “suhol”

O kaya’y ‘di secessionist ang ka-negosasyon

Nalimutan daw po yatang, MILF ay naglalayon

Na “pirasuhin ang Mindanao”, para sila ang kumontrol

MILF ay rebeldeng ang nais ay magsarili

Meron silang bandila, mga kampo’t territory

May kawal din sila, ang “Bangsa Moro Army”

Na kalaban ang sundalong, ina-ambush na parati

Teritoryo rin daw nila, kanlungan ng terorista

At sanctuary ng kriminal na sa batas pumupuga

May kumander din daw silang pasaway at kumokontra

Tila command ng “higher ups” walang saysay sa kanila

Paano raw kung ang pera, ibinili lang ng bala

At ito ang umutas sa sundalong nagpatrulya?

Kayo raw ba’y hindi man lang uusigin ng konsensiya

Sa kamatayan po ng kawal na pinatay sa pagtudla?

O, ‘di kaya’y may leader na sa BMLI ay nagtapos

Na nag-plano at namuno sa successful na pag-ambush

Ang expertise ay ginamit para sundalo ay maubos

Kayo po ba sa sitwasyon, hindi man lang malulungkot?

Kung katuwiran ng gobyerno, ang pera ay ia-audit

At titiyakin din po nilang sa tama lang magagamit

Komento ni Mandy, ‘di raw n’ya maiwasang mainis

Ang gobyerno raw natin, kung ma-isip tila paslit

Sa sariling bakuran daw na kontrolado ng gobyerno

May tanggapan pa rin daw pong ‘di liquidated itong pondo

Ang rebelde pa po kaya, ang maging “honest” dito

At kung gawin man po nila, maniniwala raw ba tayo?

Ang “enemy of the state” raw ba’y, dapat bigyan ng salapi?

Ang tanong ni Mandy na ‘di makuhang mangiti

‘Di raw kasi n’ya maatim na kalaba’y bumahagi

sa “taxes” na binayara’t sa gobyerno’y isinubi

Ang ganitong ka-peace-talk daw nararapat pag-ingatan

Suriin ang sinasabi’t ginagawa’y pag-aralan

Kung government peace panel natin, matalino pero “hangal”

Siguradong mas problema sa bansa natin ang daratal

Ang sabi ni Juan, nalalarawan daw po dito

Ang kahinaan ng gobyerno at “baklang pamumuno”

Ang kapalpakan daw po noon ni Presidente Arroyo

Polisiyang ginagaya, inuulit lang ni Aquino

* BMLI - Bangsa Moro Leadership and Management Institute

@Malayang Isip

Dimasalang, Philippines

October 29, 2011