Zubiri's Resignation

Debate ni Kiko at Malaya

Zubiri’s Resignation

Ang sabi ni Juan, muli raw pong papalaot

Si Malaya at Kiko, sa debateng umuusok

Sa isyung “Mig’s resignation” kanilang itatampok

Kung dapat bang papurihan, senador na tumalikod

Ang wika ni Kiko, siya raw ay sumaludo

Sa inasal ni Miguel, na nagbitiw na sa puwesto

Ito raw ay isang pruwebang si Zubiri’y kabalyero

At namumukod tangi sa hanay ng pulitiko

Sa panahon daw po ngayon, totoong bihira na

Ang merong “delikadesa” at manipis, pagmumukha

Kaya raw niya pinupuri, siya raw ay natutuwa

Sa kasaysayan nang Senado’y merong isa na gumawa

Ang sagot ni Malaya, hindi raw siya kumbinsido

Na itong si Miguel, ay tunay na kabalyero

Si Zubiri’y politikong, gumamit lang ng talino

At desisyong pagre-resign, ay teknik ng isang “tuso”

Kung baga sa digmaan, nang si Mig’s ay pumalaot

Makisig at matipuno, sa laba’y ‘di natatakot

Mandirigma s’ya ng Reynang sa pandaraya’y napabantog

Imposibleng ‘di raw alam, ginagawang hokus-pokus

Ang depensa ni Kiko, hindi raw dapat na ipukol

Kay Zubiri ang sisi, sa Reyna na tinutukoy

Pandarayang sinasabi, ng testigong Lintang Bedol

Ay nangyari at naganap, si “FG” daw ang nagsulsol

Kung si Mig’s ay nakinabang, labas na raw po siya dito

Dahil hindi raw niya alam, at hindi rin niya gusto

Ngayong ang pandaraya ay nahayag na’t nabisto

Nais niyang patunayang, siya raw po’y maginoo”

Ang ulos ni Malaya, sana raw po ay noon pa

Nag-resign si Zubiri, kung meron daw na kunsensiya

Ngayong “multo ng dayaan”, si Bedol ang kumumpirma

Saka lang daw n’ya naisip, na dayaa’y totoo nga

Ang ginaya raw po ni Mig’s, katulad ng sa Ombusdman

Sa napipintong pagkatalo, naghanap ng lalabasan

Nang si Gutierrez ay mag-resign, umiwas sa kahihiyan

Si Zubiri ay nag-isip, “graceful exit” na pintuan

Sa sinabi ni Malaya, si Kiko ay natigilan

Habang ito’y nagmumuni, napailing na po lamang

Nang siya ay ngumiti, sabay lahad nitong kamay

Bilang hudyat na debate’y, kanila nang tutuldukan

Sa naganap na diskusyon, si Juan ay nag-epilogue

Senyales na ang debate’y dito muna tinatapos

Nagkasundo ang dalawang sila muna’y matutulog

Sa isyung panghinaharap, sila’y muling maghahamok

Sa panahon ni GMA, marami raw ang garapal

Mga tao’t alipores, tablang mukha’t makakapal

Ang ilan pa sa kanila, ginamit daw na “credential”

Para sila ay ma-promote, sa posisyon na very high

Ang tanong ni Juan, meron pa raw po bang iba?

Opisyal po ng gobyernong, merong delikadesa

Kung si Zubiri’y meron nito, isa siyang halimbawa

Na dapat daw ay tularan, ng opisyal na “timawa”

Malayang Isip

Dimasalang, Philippines

August 4, 2011