Tabak ni Damocles

Ang Sabi ni Juan:

Tabak ni Damocles

Ang sabi ni Juan, kay PNoy na nag SONA

Hindi raw siya napabilib sa narinig na ibinoka

Kung kanya raw mamarkahan o ga-graduhan siya

Mataas na ang “pasang awa” na kanya pong ililista

Si Juan daw ay mas interested, sa “aso” na natalaga

At magiging “tanod” natin sa tiwaling nagkasala

Dito natin masusubok kung matapang siya’t kakasa

Sa isang dating reyna’t alagad na nagpasasa

Sa ngayon ay nagsisipag, ang umakting na Ombudsman

Sa pagpa-file po ng kaso tila hindi humuhumpay

Para bagang nagpasikat, nang ang boss n’ya’y mag-resign

Kahol dito, kahol doon, ginawa n’yang pag-iingay

Kay Conchita Carpio-Morales, ngayon nakaturo

Dahil sa Ombudsman, s’yang uupo’t mamumuno

Patong-patong na kaso po na matagal ibinuro

Kanya kayang tutulugan rin na tulad ng dating aso?

Isa din daw na mamasdan, ang loyalty nito

Kung siya’y may kikilingan o papaborang mga tao

Mga “utak wangwang” daw na alagad, ni Aquino

Babanggain kaya niya o gagawing parang santo?

Ito’y mga katanungan na ‘di pa raw masasagot

Hangga’t ‘di dumaraan, new Obudsman sa pagsubok

Kung ginto ba o tanso siya, hindi natin matatalos

Ang tangi raw magagawa, abangan na lang ang susunod

Ang payo ni Juan sa bagong Ombudsman natin

Kunsensiya ang konsutahin at batas lang ang pairalin

Ang “tabak ni Damocles” na matagal ding nakabitin

Ibagsak na raw ng tuluyan sa tiwali’t taong sakim

Malayang Isip

Dimasalang, Philippines

July 26, 2011