Timbangan

Ang Sabi ni Juan:

Timbangan

Ang sabi ni Juan, ang isang timbangan

Sadya daw ginawa para gawing sukatan

Ang lahat ng bagay, dito natin matitimbang

Kung balanse o hindi, tikwas po o pantay

Sa atin pong bansa, obserbasyon ni Juan

Ay lubha na raw pong mamamaya’y nasasaktan

Sa timbangang sumusukat sa ating pamumuhay

Napakalaki na ang agwat ng mahirap sa mayaman

Ang dahilan daw po nito, ang mga namumuno

At humahawak sa timbangan na nasa ating gobyerno

Ang kanilang panukat, laging pabor sa mga tuso

Negosyanteng parang buwaya at gahaman sa tinutubo

Pansinin daw po ninyo mga kabalat ko

Kapag may petisyon sa ERC ang Meralco

Ganoon din ang NAPOCOR na talagang perhuwisyo

Panay po ang aprub ng mga “tarantado”

Ganoong sa panukat ng kalapit nating bansa

Ginagamit na kuryente, lubha pong mas mababa

Ang Pilipinas daw pong “pulubi,” nagkakandakuba

Sa pagtaas ng kuryenteng, hindi na po mapababa

Petisyon dito, petisyon doon na kanilang ginagawa

Sa panukat ng ERC, lagi silang umaakma

Hindi ba nila nalalaman, langit na raw at lupa

Ang tikwas ng timbangan sa kanilang ginagawa?

Ang nasa gobyerno, kahit sino pa ang mamuno

Sa kanilang timbangan daw, mahihirap ang natatalo

Kaya nga po sinasabing, sila pa ang “abugado”

Ng kumpanya at negosyong, ang produkto ay serbisyo

Ang sabi ni Juan, hindi daw siya magtataka

Kung bakit sa bansa natin, negosyante ay “timawa”

Ang nagtitimbang dito, nguso’y nagmamantika

Habang silang mahihirap, kinakain na ay lupa.

Malayang Isip

Dimasalang, Philippines

August 11, 2011