New Nation?

Ang Sabi ni Juan:

New Nation?

Ang sabi ni Juan, ang haba na ng prusisyon

Sa usapin ng “peace talk” sa Mindanao na rehiyon

Ilan na bang presidente, ang dito ay tumugon?

Anim na po yata, mula Makoy hanggang PNoy

MNLF ni Misuari, nawala na sa eksena

MILF ang pumalit na may sariling agenda

Sila rin po ay nanganak na, ng mga terorista

Abu Sayyaf at paksiyon na, lumihis na ng ruta

Sa panahon ni GMA, may napagkasunduan na

Pero ito’y nabasura, nang sa Supreme Court ay ipasa

Ang desisyon nga pong ito, malagim ang ibinunga

Kumander ng MILF, inosenteng tao ang giniyera

Sa gobyerno ni PNoy, patuloy ang negosasyon

Kapayapaan sa Mindanao, hinahanap ang solusyon

Ang ating presidente, nagpunta sa bansang Hapon

Pinuno ng MILF, kanya pong kinapulong

Opinyon ni Mandy, dapat maging matalino,

ang government negotiator, dahil MILF daw ay “tuso”

Sa pakikipagkasundo, baka muling mapasubo

Ma-kompromiso ang interest, ng bayang Pilipino

Dapat din daw ay transparent , pakikipag-usap

Huwag itong itatago’t, ang paghimay ay ilantad

Ito ay isang isyung, apektado raw ang lahat

Na ayaw pong ang Mindanao, sa Pilipinas ay “mabiyak”

Kung ang negosasyon, pasikut-sikot, liku-liko

Ang una raw na “tumbukin”, komentaryo ni Kiko

Ang tunay na nilalaman sa utak ng namumuno

Kung “independent state” pa rin, sa ulo ang kumukulo

Kung ito ang matutumbok, tapusin ang negosasyon

Dahil “non-negotiable” ang kanilang nilalayon

Kung ito nama’y “autonomous”, na meron tayo ngayon

Wala na raw pagtatalo, ang peace talk po ay isulong

Ang sabi ni Juan, siya lang ay nangangamba

Sa “sub-state” na terminong, MILF ang kumatha

Baka raw po ito’y “disguise” o pang-ligaw na kataga

Na kung hindi ide-define, baka tayo’y matulala

Kapag ‘di raw mag-ingat, matatalinong negosyador

Baka bukas, makalawa, ‘pag tayo ay pumaroon

Magulantang na lang tayo, may MILF immigration

Na sisita sa ‘ting passport, dahil sila ay “New Nation”

Malayang Isip

Dimasalang, Philippines

August 12, 2011