Sacrificial Lamb

Ang Sabi ni Juan:

 Lehislatura vs. Hudikatura

Ang sabi ni Juan, may nabasa siyang komentaryo

Sa Kabalat Blog ni Arman, na noon ay nagkuro

Ang tanging layunin daw ni GMA sa pagtakbo

sa kongreso’y magka-tari’t, pang laban daw nito

Sa pananaw ni Juan ito raw po ay totoo

Kung baga sa chess board, si GMA ay nagpuwesto

Ng gagamiting kalasag pagkatapos ng termino

Sa political chess game, ayaw niyang padehado

Ang gobyernong PNoy, siya ngayo’y hinahamon

Mga kaso ng plunder, lima na pong suson-suson

Pati na si First Gentleman, na kinatulong niya noon

“Segunda manong helicopter” sa kanya ang pang-kanyon

Bago siya makidigma, si GMA raw ay bumuo

Ng mga magtatanggol at sa laban n’ya ay susubo

Ang dalawa n’yang anak, sa kongreso’y nakaupo

Kasama na si Iging, bayaw niya’t “taga-ako”

Ang dagdag ni Mandy, mga “pawn” di’y inilagay

Na “pambala sa kanyon”, at una ring ihaharang

Sila po’y armado rin ng dilang mapang-ligaw

At “nilubid na buhangin” ang armas na ihahataw

Ang sabad ni Kiko, may casualty nang ikinulong

Isang dating bookkeeper, na humarap sa Blue Ribbon

Ipina-contempt s’ya ng Senate, sa maling impormasyon

At ang laging bukang-bibig, “utos daw po ito ni Cong”

Ang sabi ni Juan, marami pang “sacrificial lamb”

Sa kampo ni GMA, na sa giyera’y ilalaban

May salapi s'yang magagamit, at iba pang pang-dahilan

Kasama na po dito ang isyung "pangkalusugan"

Malayang Isip

Dimasalang, Philippines

August 23, 2011