Umaga sa Takipsilim

Ang Sabi ni Juan:

Umaga sa Takipsilim

Ang sabi ni Juan, kapalara’y parang gulong

Mga bagay at pangyayari, tila sadya’t nakaukol

Ito ay dinisenyo na iisa ang direksiyon

Ang pagbaba at pagtaas ay likha raw ng panahon

May panahon nang pagsilang, panahon nang kamatayan

Panahon nang pagsasaya, panahon nang kalumbayan

May tao rin daw noon, dati’y makapangyarihan

Sa kanyang pagbaba, kaakibat ay kahinaan

Sa panahon ni GMA, “panahon daw ng tulisan”

Na ang ninanakaw pera po ng taong bayan

Panahon nang pandaraya’t kasinungalingan

Panahon nang pagtatakip sa tunay na kalagayan

Ang panahon ngayon, “panahong pagbubulgar”

Panahon nang pag-usig, panahon nang katarungan

Panahon nang paghawi sa lambong na naiwanan

Panahong susukat din kay PNoy na kakayahan

Ang isa sa tanong na panahon ang susuri

Kung tayo ay nagkaroon ng “bogus” na Presidente

Kapag ito ay nalantad, kahit na raw si FPJ

Saan man daw naroroon, matutuwa’t, mangingiti

Pandarayang naganap daw sa 2004 na halalan

Na noo’y nabunyag na pero sadyang pinagtakpan

Ang mga nagtakip dito na ngayo’y nasa ilang

Ito na raw ang panahong usigin sa kasalanan

Ang sabi ni Juan, mananatili raw ang dilim

Hanggat ‘di nasasagot ang noon ay inilihim

Ngayon na raw ang panahong, paglilinis, pag-aagiw

Upang ang umaga sumilay sa takipsilim

Malayang Isip

Dimasalang, Philippines

July 22, 2011