Mga Buto ng Kalansay

Ang Sabi Ni Juan:

Mga Buto ng Kalansay

Ang sabi ni Juan, isa raw sa kanyang gusto

Sa gobyerno ni PNoy marami raw nabibisto

Mga “buto ng kalansay” na naiwan ni Arroyo

Isa-isang nahuhukay sa loob ng mga nitso

Sa kanyang panahon daw si GMA ay naglaro

Ng “Game of Generals” habang siya’y namumuno

Nang siya ay manaog, nagsingawan na ang baho

May “pabaon at pasalubong”, sa AFP’y nakatago

Kaalyadong gobernador na si Zaldy Ampatuan

Na nasangkot sa massacre sa bayan ng Maguindanao

Kanya na pong sinariwa, ang pinagsamahan

nila ni GMA, nang mandaya sa halalan

Kaya raw po s’ya umawit, dahil siya’y iniwanan

Ng dating presidente na kanya raw natulungan

Ngayong siya’y nakakulong, nag-iisa sa kangkungan

Mga buto ng kalansay, kanya na ring hinalukay

Hindi man daw dinirekta, kay GMA din nakaturo

Alingasaw sa PCSO na nagdulot po ng baho

Butong “intelligence fund” na pinapak ng namumuno

Ngayon daw ay inuungkat kung sino ang “pasimuno”

Ano pa’t ito raw po, paghahawi na ng daan

Na meron pong mga butong sa libinga’y mabubungkal

Sepulturerong naghahanap ngayon daw ay nakatunghay

Nakatingin sa liwanag sa ilalim ng mga hukay

“Alipores” ni GMA na sa buto ay nagbaon

Sa loob daw nang siyam at mahabang mga taon

Ngayon daw ay mapapansing umiikot na ang tumbong

Kung paano haharapin mga kasong suson-suson

Sa pagharap sa Senado, tila wari nakalimot

Na ang ginagaya ang Heneral po na si Ligot

May nagkakasakit din dahil daw po natatakot

At nag-iinarteng umiiyak, sumisinghot

Ang sabi ni Juan ito raw po’y may bentahe

Sa posisyong nilalaro ni PNoy at ni GMA

Sa “political chess game”, na may sulong at atake

Baka raw sa hinaharap, si GMA ay ma- mate

Malayang Isip

Dimasalang, Philippines

July 14, 2011