PCSO: A Milking Cow?

Ang Sabi ni Juan:

PCSO: A Milking Cow?

Ang sabi ni Juan, meron na namang nabulabog

Na sa ngayon ay isyu’t sa senado’y kinakalog

Tanggapan ng PCSO na sa sugal umiinog

“Milking cow” daw ng opisyal, milyones ang tinitimbog

Nagsimula sa SUV na pa-birthday sa Obispo

Na ni-request daw po nito kay Presidente Arroyo

Ang iba pa na nabigyan at pangala’y rumehistro

Pawang member ng Catholic, kay GMA na alyado

Pinupunto po dito, ang pondo ay pam-publiko

Na di dapat ginagamit sa personal na kapritso

Dapat daw po ay parehas at walang sinisino

Walang sekta’t oposisyon, pantay dapat ang pagtrato

Dito rin po ay nabuking, opisyal na namorsiyento

Sumingil daw ng beinte, naging kuwarentang sarado

Sa advertising ng PCSO na daang milyong piso

Nakulekta ni Garcia’t sa account n’ya dineposito

Sumunod din na naungkat at kanilang nabisto

Intelligence Fund daw po, milyon-milyong piso

Ito po ay pondo na laging subject ng abuso

Parang usok na lumabas na bigla pong naglalaho

Sa lumutang na evidence, na atin pong nakikita

Hindi dapat ang Ombusdman, basta na lang tutunganga

Dito’y meron daw pong “plunder” at dapat mag-imbestiga

Dahil milyones na salapi, ang tila po nangawala

Maging ang BIR hindi dapat kumuyakoy

Dahil dito’y may kumita na madaling matutukoy

Isampa raw po ang kaso upang ito ay gumulong

At hayaang mga “tuso” sa korte na magsi-taghoy

Sa ngayon ay dumarami mahihirap na may-sakit

Sa pagpila sa PCSO, mistula raw mga yagit

Namumuno raw po ngayon ang sabi ay masusungit

At ang tulong pang-medikal pahirapan kung masungkit

Sa programang pang-kalusugan, bansa nati’y nahuhuli

Kumpara sa kapit-bansang sistema ay natatangi

Ang pondo ng PCSO na sabi ay pang-charity

Ilaan lang sa mahihirap, may-sakit na nanghihingi

Ang sabi ni Juan dapat daw pong imyendahan

Ang charter ng PCSO, batas nilang sinusundan

Masusi raw pag-aralan, kaluwagan ay higpitan

Upang di na gawing “baka” at gatasan ng gatasan

Malayang Isip

Dimasalang, Philippines

July 8, 2011