Balik Tanaw: Sa mga Isyung Nagsingawan

Ang Sabi ni Juan:

Balik Tanaw:

Sa mga Isyung Nagsingawan

Ang sabi ni Juan, muli niyang binalikan

Ang mga kaganapang naging isyu’t tinalakay

Sa maikling panahon daw, maraming natuklasan

Sa ilang sangay ng gobyerno, may sistemang umiiral

May AFP daw tayong “tagapagtanggol ng bansa”

Na nagsilbing “gatasan” ng Heneral na masisiba

“Pasalubong” at “pabaon” , sa kanila nagsimula

Sistema pong pinairal at sa ati’y bumulaga

May COA daw tayong “mata ng bayan”

Taga-audit ng transaksiyong may katiwalian

Pero may auditor ditong mga mata’y nasisilaw

Sa salaping “ambon”, sa kanila ay pantapal

May OMBUSDMAN daw tayong “tanod ng bayan”

Ngunit ang naupo nagtutulog sa pansitan

“Kasong patong-patong,” mahabang taong inupuan

Kaya mandarambong, namamasyal daw po lamang

May SANDIGANBAYAN tayong, “isa pong hukuman”

Na ang nililitis mga kasong katiwalian

Pero sa “plea bargain”, payag silang malusutan

Kuntento na sa kalahating isosoli ng kawatan

May LTO tayong “taga-rehistro ng sasakyan”

Iba’t ibang behikulo sa kanila’y dumaraan

Ngunit merong “carnap” na nagagawang legal

Dahil narerehistro, kahit ito po ay nakaw

May BuCor daw tayong “nagma-manage sa Bilibid”

Sa layuning ireporma, kriminal na nakapiit

Pero merong preso na “VIP” po ang treatment

Nakapaglalabas-pasok, sa Bilibid pumupuslit

Ito daw ay ilan lamang sa mga tanggapan

Sa lumipas na buwan naging balita’t nagsingawan

Ito daw ay isang “kanser” na sa ati’y umiiral

Na kapag di nagamot, magdurusa po ay ang bayan

Ang sabad ni Kiko, meron pa raw mga bulok

Sa tanggapan ng gobyerno, nangingitlog daw ng bugok

Kapag naglutangan, saka natin natatalos

Na may sistema po silang, ikinukubli lang sa sulok

Ang wika ni Mandy, ito daw ay nagaganap

Na sa ating lipunan, ‘di po katanggap-tanggap

Pero reyalidad na sa ‘ting bansa ay laganap

Ang ganitong kabulukan, patuloy na nagnanaknak

Ang payo ni Juan kay PNoy na nakaupo

Dapat siyang magseryoso, sa sistemang nabibisto

Ang ganito daw mga isyung nabubuking sa gobyerno

Sa kanya po babalandra’t leadership n’ya ang babaho

Malayang Isip

Dimasalang, Philippines

June 1, 2011