Head's Will Roll

Ang Sabi ni Juan:

Heads Will Roll

Ang sabi ni Juan, isa na raw bukang-bibig

Ni PNoy ang katagang, palagi niyang inuulit

“Heads will roll” daw po, dinig nilang sinasambit

Kapag merong kapalpakang, tauhan n’ya ang sumabit

Ito’y hindi po nangyari sa tauhan n’yang si Puno

Na sa huweteng payola, isa sa naituro

Ito daw po kasi, “best friend” ng Pangulo

Kaya ‘di pinugutan, bagamat pinag-lie low

Isa pa sa sumabit, Usec Torres ng LTO

Sa isyu ng kotseng carnap na narerehistro

Stradcom daw na take-over, siya rin ang itinuro

Ngunit nag-leaved lamang ito na ulo ay nakatungo

Kamakailan lamang, isa uling appointee niya

Ang sa tungkulin daw nito, tila nagpabaya

Isang convicted criminal, nahuli pong gumagala

Nakapuslit sa bantay n’ya, na nakatunganga

Ang bulok na sistema, sa ating correctional

Mga namumuno dito, ang nagpapairal

Ngayong nahayag na, sila’y nagtuturuan

Kanya-kanyang iwas, sa nangyaring kapalpakan

Retirado pong pulis na si Totoy Diokno

Na sa ating BUCOR, Director na namumuno

Nagsabi po itong ‘di siya dapat ang ituro

Dahil responsibility, di niya solong inaako

Ang ganitong katuwiran, alibi ng pilosopo

Na hindi raw competent sa kanilang trabaho

“Command responsibility” nawala sa kanyang ulo

Gayong noong pulis siya, ito ang kanyang “motto”

Ang sabi ni Juan, ito raw po’y isang hamon

Kay PNoy na nagsasabing, merong ulo na gugulong

Ang bayan ay naiinip, makakita na ng sampol

Sila ngayo’y nag-aabang kung may ulong mapuputol

Malayang Isip

Dimasalang, Philippines

May 24, 2011