Kotongero

Ang Sabi ni Juan:

Kotongero

Ang sabi ni Juan, may mga taong ang trabaho

Maayos daw kung manamit at unipormado

Madalas na naglalakbay, sakay ng motorsiklo

Nagmamando ng sasakyang naiipit sa trapiko

Kanila daw hinuhuli’y tsuper na lumalabag

Na kung magpatakbo’y pabala-balagbag

Kapag nag-violate, sinesenyasan daw agad

Na itigil ang sasakyan sa tabing maluwag

Nahuhuling tsuper, may nagmamakaawa

May nangangatwiran ding ‘di raw nila sinasadya

Ito namang nanghuhuli, paniniket ang ibabanta

Kapag ‘di naglagay, lisensiya nila’y mawawala

Kapag may atik nang, palihim na iniabot

Ng driver na tumatawad o nagkukuripot

Kukunin din daw ito na nakasimangot

Saka ibubulsa’t, sasabayan ng talikod

Ang sabi ni Juan, mauuri ding "pulubi"

Ang mga kotongerong, lagay ang hinihingi

Kanilang tungkulin daw isa lamang baluti

Dahil nahahayag sila sa inaasal o ugali

Malayang Isip

Dimasalang, Bulacan

June 4, 2011