Done Deal

Ang Sabi ni Juan:

Done Deal

Ang sabi ni Juan kanya na raw inaasahan

Ang desisyong kailan lang, inilabas ng Sandigan

Dito nga po ang plea bargain kanilang pinaboran

Sa kabila ng alingasngas na dito ay nagsingawan

Nang ito po ay dinggin sa Senado’t Kongreso

At si Gutierrez gisahin sa plea bargain na ito

Ang tindig ng Ombudsman ‘di na ito mababago

Sa kabila po ng hiling na kanya daw i-withdraw

Ang kuro ni Juan, bagamat for approval

Ang sinasabing plea bargain sa Sandiganbayan

It’s already a “done deal”, ‘di na maiiwasan

Kaya nga po sa desisyon, kanila itong pinagtibay

Kung baga sa ulam ito po’y naluto na

Habang sa kongreso, mambabatas ay nakanganga

Ang debateng umaapoy at kanilang ibinuga

Wala rin pong saysay dahil kasado na pala

Ang “menung adobo” ng ating Ombusdman

Ang siya ring adobo na niluto ng Sandigan

Kaya ano pa po ba ang dito’y ating aasahan

At kanilang ihahain sa mesang kakainan?

Ngunit ang putaheng sa tao ay inihanda

Hindi po kayang tanggapin ng kanilang sikmura

Kaya si PNoy po napilitang magsalita

At sinabing nasa vacuum Sandiganbayan na nagbaba

Sentimyento po ngayon ng bayang nag-iisip

Ganito ba kadaling mandarambong ay pumuslit

Kahit na po pala milyon-milyon ang kinupit

Papayag na ang korteng kalahati ang ibalik

Ang Second Division ng Sandigang nag-apruba

Target ngayon ng batikos ng mga nadismaya

Ang sabi ni Juan, bahagi daw ito ng sistema

Na totoo nga pong “bulok” umiiral na hustisya

Malayang Isip

Dimasalang, Philippines

May 13, 2011