Ibigay kay Caesar ang kay Caesar

Ang Sabi Ni Juan

Ibigay Kay Caesar ang kay Caesar

Ang sabi ni Juan, nalimutan daw yata

Nitong si Mikey Arroyo nasa Bible na talata

Ibigay daw kay Caesar, ang kay Caesar na itinakda

Ito nga po ay ang “buwis” sa namamahala

Noong ang nanay niya, ay isa pang reyna

May yaman si Mikey na kanya pong itinala

Sa mga dokumento, malinaw na makikita

Di mapasusubalian na ito ay kanya nga

Ngunit nalimot niya, kanyang buwis ay bayaran

Kaya may record na siya po ay lumiban

Nang ito ay masilip, kuwentahin ng BIR

Nag-file po ng kaso, at siya nga’y nasampaham

Ngunit ang reaction nitong si Mikey Arroyo

Na representive ng TODA at mga sikyo

Harrasment daw ito ng pangulong nakaupo

At inililigaw lang daw, atensiyon ng mga tao

Sa katuwirang ito, si Juan daw ay natawa

Iba kasi ang “lyrics” niya kay Henares na kinanta

“Tax evasion” po ang awit na pinaka-tema

Sa kanya, ito raw po, awitin ng pulitika

Ang payo ni Juan, sa anak ni GMA

Tigilan na raw nito, ginagawang pasakalye

Kung siya man ay may utang na napakalaki

Bayaran na lamang daw, at huwag ng mag-inarte

Sa “kolektor ng bayan” ituloy pang paninilip

Sa mga negosyanteng, sa buwis nila ay nag-suwitik

Sa gobyerno naman ni PNoy, kapag ito’y ginagamit

Huwag ninyong sasayangin, at sa tao ay ibalik.

Malayang Isip

Dimasalang, Bulacan

April 16, 2011