Senyales

Ang Sabi ni Juan:

Senyales?

Ang sabi ni Juan, siya’y naaalerto

Sa nangyayaring kaganapan sa ating mundo

Ang climate natin ngayon, tila nagbabago

Parang ulyaning matanda ‘di alam ang tinutungo

Kapansin-pansin, paglaganap ng kalamidad

Sa iba’t ibang bansa at malalaking siyudad

Sa bansang Haiti, lindol dito ang tumibag

At pinakahuli, naganap sa New Zealand

Kahapon naman, nilindol ang bansang Japan

At ito’y napabalita, sa TV ay nasaksihan

Ang kalunos-lunos nilang kalagayan

Tila isang bangungot na ayaw nating maranasan

Sa kabilang dako, sa bansang may disyerto

Na ang gas at langis, kanilang produkto

Mga mamamayan, dito’y hindi na rin kuntento

Sa kanilang lider, na matagal na namumuno

Nauna na ang Egypt, pinatalsik si Mubarak

Sinundan ito ng Libya pero 'di pa natitiyak

Ang banta ng kaguluhan patuloy ang paglaganap

Parang siga na nag-apoy, at ngayon ay kumakalat

Sa pagtuklas ng talino, mga tao’y patuloy pa

Sa imbensiyong makabago, marami ang namamangha

Tila munting mga Diyos, ang dito ay lumilikha

Ang imposible natin noon, karaniwan ng makikita

Kasabay ng pag-unlad, mga tao’y nananaghoy

Kahirapa’y nadarama, dumaraming nagugutom

Habang sa gobyerno, patuloy ang pandarambong

Epidemya’y labas-pasok, sa sakit na di matukoy

Ang sabi ni Juan tila ito ang “senyales”

Ng kabagabagang, marami ang mapapalis

Sa atin pong mundo, kapag tao’y 'di nag-isip

Tao rin ang magwawasak, tayong lahat ang tatangis

Ang payo ni Juan, taimtim na manalangin

At pawang kabanalan, sa damdami’y pairalin

Ang buhay nating hiram, hindi dapat na sayangin

Sa ating kamatayan, aral ng Diyos ang baunin

Malayang Isip

Dimasalang, Philippines

Marso 12, 2011