Awit sa Isang Heneral

Ang Sabi ni Juan:

Awit sa Isang Heneral

Ang sabi ni Juan, siya’y naniniwala

Sa buhay nating ito, may nakatadhana

Panahon ng pagsibol, panahon ng pagkawala

Panahon ng ligaya, panahon ng pagluha

Nang si Joseph Estrada, sa trono’y bumagsak

Dito na si Gloria nagsimulang umangat

Si General Angie Reyes na noo’y Chief of Staff

Agad tinalikuran kumpare niyang Erap

Ang suporta niya, kay GMA ibinigay

Kaya nagpatuloy siya sa pananagumpay

Siya rin ay na-appoint sa maraming tanggapan

Na mahabang panahon niyang hinawakan

Sa pagbaba ni Gloria, siya ay nanaog rin

At hindi na nakatanggap ng anumang tungkulin

Siya ay nanahimik, bilang private citizen

At namuhay na pamilya ang kanyang kapiling

Ngunit hindi nagtagal, buhay niyang mapayapa

Sa plea bargaining ni Garcia, siya ay nabigla

Isang George Rabusa, ang sa Senado’y nagsalita

At siya ay idinawit, na sa milyones nagpasasa

Ito ang tumigatig sa magiting na heneral

Na noong una ay umasta na siya ay lalaban

Mga taong nag-akusa, kanya ngang kinasuhan

Sa layunin po na malinis, ang kanyang pangalan

Ngunit ang panahon, kay General Reyes

Tila bumaliktad ng three hundred sixty degrees

Kung si Presidente Erap, noon ay naipit

Siya naman ngayon, posibleng manganib

Ito ang nagsilbing sa kanya’y bangungot

Na maulit ang kasaysayang, siya naman ang sangkot

Pagbagsak ni Erap na gusto niyang malimot

Multong nagbabalik, sa kanya ay tumakot

Parang mandirigmang sugatan at nanghina

Sa ulos ng kumpare niyang, siya rin ay itinatwa

Ang bantayog niyang itinayo, siya ngayong ginigiba

At kalbaryo ang sa hinaharap kanyang nakikita

Nang siya’y dumalaw sa puntod ng kanyang ina

Tila dito nagsusumbong, na di na niya makakaya

Dito na rin marahill niya binuo ang pagpapasiya

Na kit’lin ang kanyang buhay upang sila’y magsama na

Ang sabi ni Juan, ito daw ay awitin

Na kanyang sinulat para sa inyo’y iparating

Ang katotohanan daw po na hinahanap natin

Sa gitna ng liwanag, may buhay na kukulimlim

Ang payo ni Juan, tapat tayong mamuhay

Hindi lang raw kasi, sa pagkain tayo nabubuhay

Kung hindi sa salitang ang DIYOS ang nagbigay

Mga gintong aral itong ating natutuhan

Malayang Isip

Dimasalang, Bulacan

February 8, 2011