Senate Investigation

Ang Sabi ni Juan:

Senate Investigation

Panawagan ni Juan, hindi raw dapat mahinto

Ang senate investigation na sa Senado ay kumulo

Kamatayan ng heneral na dito ay pinaupo

Hindi dapat maging excuse, para sila mabalaho

Kaso daw po ng corruption, ang dito ay naging isyu

Na di dapat masapawan ng anumang sentimiyento

Katotohanang malalantad, ninanais ng publiko

Para nga po mahubaran, mandarambong na sundalo

Ang bayan daw itong saksi, sa kapal ng pagmumukha

Ng heneral na may kaso’t ang sala ay itinatwa

Dahil daw po dito hindi na dapat mabahala

Na sila ri’y magsu-suicide kapag nga po napahiya

Testigo po dito, isang dating kampon nila

Kaya mas credible din daw at alam ang anomalya

Kung meron pa itong, mga taong ikakanta

Ay hayaang iparinig, sa madla ay ipakita

Subalit ang kinanta, dapat daw na isa-plaka

At sa korte ay gamiting, matibay na ebidensiya

Ang heneral na idinawit, sa milyon daw nagpasasa

Sampahan din ng kasong nararapat sa kanila

Ang sabi ni Juan, mambabatas sa kapulungan

Imyendahan mga batas na dapat daw remedyuhan

In aid of legislation maganda po ang dahilan

Kung magagawa nila ito at maisasakatuparan

Malayang Isip

Dimasalang, Philippines

February 10, 2011