Ang Sabi ni Juan
Terorismo

Ang sabi ni Juan, ngayo’y nagbunga na
Travel advisory ng ilang mga bansa
Banta ng terorismo na noo’y isang haka
Tila may basehan upang hindi magtiwala

Ang bus na pinasabog, isang patotoo
Na ang terorismo threat nga’t peligroso
Ang mga inosenteng nabiktima nito
Ating pong ipagdasal, sumalangit nawa po

Wala pong magagawa ang ating gobyerno
Sa atakeng ilulunsad ng mga demonyo
Mga kampon po nila’y nakakalat, nakatago
At ang hinihintay, malingat po tayo

Sa sitwasyon ito, tayo pong Pilipino
Lahat ay magka-isa para ito maigupo
Tayo ay magmatyag, pakiramdam talasan po
Paghahasik po ng lagim, ay pihadong mabibigo

Ang bansa nating ito ang ating tahanan
Para sa ‘ting Pilipino kaya dapat na ingatan
Huwag tayong papayag na dito ay mangibabaw
Mamayani ang mga diyablo na salot at tampalasan

Ang sabi ni Juan, paglaban sa terorista
Hindi lang sa gobyerno natin dapat na iasa
May role din po tayong, dito ay itataya
Upang makatulong, mabawasan ang pinsala


Malayang Isip
Dimasalang, Philippines
January 25, 2011