Bulok na Sistema ng Hustisya

Kung pinilantik ko ang pulis at media

Sa hostage taking, na naging trahedya

Hindi ko matiis na ‘di magsalita

Sa isang tanggapang nagbibigay hustisya

Pulis na may kaso, ‘di ko kinakampihan

Ginawa niyang sala’y, hindi makatuwiran

Isang bagay lang ang dito’y, aking pupulaan

Ang naging performance ng ating Ombudsman

Nang-hostage na pulis, hingi ay hustisya

Sa kasong idinulog, na ikinatanggal niya

Nguni’t ang Ombusdman, inupuan lang pala

Kaya si Mendoza’y nagalit, nagwala

Bagamat ‘di tuwirang sila ang sinisi

Pero kung lilimiin, sila rin ay kabahagi

Kaso ang pinag-ugatan, sa mga nangyari

Na ang tanging hingi’y, desisyong madali

Maraming nadamay, maraming nasawi

Kayo ba sa Ombudsman ay nakakangiti?

Gayong alam ninyo, sa inyong sarili

“Hustisyang pinatulog” ang ugat at sanhi

Kung sa agos ng tubig, ihahalintulad

Na may sanga-sangang, daloy na naglandas

Kapag ating tinurol, pinagmulang butas

Sa gripong depektibo pala tumatagas

Sistemang ganito ay sistemang bulok

Na sa aking kalooba’y, nagbibigay lungkot

Ang sobrang kabagalan, nakabuburaot

Sa taong apektado’y may panganib na dulot

Ito nawa'y maging leksiyon sa inyong alagad,

na batas ng tao ang ipinatutupad

Terminong “justice delayed is justice denied”

Ang nagiging resulta ng hustisyang makupad

Arman T. Francisco
City of San Jose Del Monte, Bulacan
August 30, 2010