Mga Patabaing Baboy

Sa administrasyong ito ni P-Noy Aquino

Maraming nahayag at nakitang multo

Nang noo’y inampon ng dating pangulo

Kaya pala utang natin, higit pang lumobo

Mga “patabaing baboy” sa ating gobyerno

Ay kabi-kabila pala, sa iba’t ibang puwesto

Mga GOCC, at opisyales nito

Nagpapasasa pala sa laki ng suweldo

Ang kakapal ng mukha, ng mga taong ito

Na tayong sambayanan ang pinaglululuko

Korporasyong hawak nila’y wala namang tinutubo

Pero nagpapakabundat at nagpapaka-mucho

Pobreng mamamayan, hilahod na sa dusa

Na ang pinagtitiisa’y kakarampot na biyaya

Hindi tuloy nila maiwasang umusal ng sumpa

Tamaan ng kidlat, ang mga timawa

Ngayon ay nagbabantay, panitik ko’y nakatanaw

Sa mga pumalit at may tangkang magnakaw

Asahang pipilantik ito, para sila ay saktan

Sa mga kataga kong may pait at anghang

Bakit ako magtitiis na nakahalukipkip

at palalampasin lang, kanilang pambubuwisit?

Kahit ako’y langgam na sa tingin nila’y maliit

Sila’y aking kakagatin, ng napakasakit

Malayang Isip

Dimasalang, Philippines

August 19, 2010