RA 9344: Juvenile Justice and Welfare Act

Ang Sabi ni Juan:

RA 9344: Juvenile Justice and Welfare Act

Ang sabi ni Juan, meron tayong mga batas

Na kung merong butas, lalo pang ginagawak

Isang halimbawa’y ang “Juvenile Justice & Welfare Act”

Na simula nang ipatupad, hanggang ngayo’y pumapalpak

Sa “luma” nating batas, “nuwebe anyos” po pababa

Ang hindi mananagot sa krimen n’ya na nagawa

Ito po ay itinaas, “kinse anyos” na pong bata

Ang kapag nakalabag, walang salang matatala

Dahil dito’y namayagpag ang mga sindikato

at batang kinse anyos, kinukuhang desipulo

Sa krimen na ginagawa, ‘di po sila nahohoyo

Kaya pobreng biniktima, nagkakamot po ng ulo

Ang awtor po nitong batas, si Senator Kiko

Na inuulan ng batikos, sa batas na “balikuko”

Sa halip daw makabuti, ang dulot po ay perhuwisyo

‘Di raw sila masisisi, kung sa kanya’y mag-sentimyento

Depensa ni Pangilinan, hindi raw layon ng batas

na ang batang nagkasala, sa parusa ay iligtas

Kanya ngayong sinisisi, LGU daw ang nasilat

Dahil “intervention program” nito, hindi naman natutupad

Wala rin daw itinayong, hiwalay na detention

Sa mahuhuling mga bata, para dito ay ikulong

Ang pondo ring inilaan, sa pulis na nagte-training

sa juvenile cases daw po, matagal na nabinbin

Komento ni Mandy, ito po ang problema

Sa legislators natin na lagi pong nauuna

Sa ginagawang batas, ang kanila lang nakikita

ay ang ganda ng “pabalat”, at ‘di loob ng inakda

Para bagang ang senador, nang gumawa ng kariton

Hindi na n’ya iniisip kapag ito’y pinagulong

Kabayo po na hihila, wala pa po’t naglimayon

Kaya nang gumulong na, “paurong” po’t “di pasulong”

Ito raw po ang nangyayari, sa batas n’yang isinulong

Kaya naman nagpi-piyesta, mga batang alimuom

“Batang hamog”, “batang jumper” at iba pang “batang hoodlum,”

ang tumubo at nagsupling, sa batas n’ya nagkakanlong

Ang payo ni Juan, batas ngayo’y solusyunan

Amyendahan, suspindihin, gawan agad ng paraan

Problema po’y lumalaki, lumalawak sa lipunan

Na kapag pinalawig pa, “monster” na pong hahantungan

@ Malayang Isip

Dimasalang, Philippines

September 14, 2011