The Quick and the Dead

The "Quick"...

... and the "DEAD

Ang Sabi ni Juan:

The Quick and the Dead

Ang sabi ni Juan, siya raw po’y natutuwa

Na sa isang insidente, ‘di nagbunga ng masama

Kongresistang nanapak daw, buhay pa po’t ngumangawa

Dahil kung nagkataon, pamilya n’ya ay tulala

Sa totoo po lamang mga kabalat ko

Kung kayo ay mananakit, o kaya’y magbibiro

Iwasan pong gawin ito sa de-bogang mga sikyo

Dahil peligroso na kayo po ay madedo

Ako po ay may kuwento, na nangyaring totoo

Sa isa pong sikyong naka-detail sa puwesto

Siya po ay minura, tinawag na tarantado

Ng isang opisyal, sa local na gobyerno

‘Di po alam ng opisyal, ang sikyo ay problemado

May sakit daw po ang anak, ‘di pa siya sumusuweldo

Sa kanyang trabaho, tahimik lamang ito

Ngunit ang isipan, lubha nga pong aburido

Dahil may bodyguard, mayabang na opisyal

Ang sikyo’y kanya pang, sa mukha’y sinampal

Sa harap ng mga taong noon at nagdaraan

Hiniya n’ya ang guwardiyang napayuko na lamang

Sa isang kisap mata, shotgun nito’y ikinasa

Sabay putok po sa dibdib ng opisyal na siga

Ang kanyang bodyguard na nagulat, napanganga

Bago po nakakilos, sumunod ding bumulagta

Ang sikyo ay nakulong, sa salang pagpatay

At kasong “homicide” sa kanya’y ipinataw

Nang siya’y tanungin, ang sinabi po lamang

‘Di raw siya nagsisisi, dahil siya ang nabuhay

Ang opisyal pong dinedo may pinag-aralan

Ang kanyang posisyon, makapangyarihan

Sa kamatayan niya, may naiwanan siyang yaman

Pero dahil “tigok” na nga, ‘di na niya matitikman

Ang sikyo na “very quick”, nasa bilangguan

“Libre po sa pagkain” kahit walang hanap-buhay

The arrogant official, and “dead on arrival”

Sa sementeryo nakabaon, “inuuod na ang bangkay”

Ang sabi ni Juan, magsilbi pong paalala

Ang kanyang ikinuwento, sa arogante’t siga-siga

Kung kayo po’y magyayabang, iwasan n’yo ang may boga

Lalo’t takbo nitong utak, ‘di n’yo naman nakikita

Ang payo ni Juan, dapat daw pong “pasalamat”

Si Congressman Pangandaman, sa sikyo na sinapak

Dahil siya ay buhay pa’t ang paa nya’y nakayapak

At hindi nakahigang, ang “ilong ay may bulak”

@ Malayang Isip

Dimasalang, Philippines

September 8, 2011