Oil Deregulation Law

Ang Sabi ni Juan:

Oil Deregulation Law

Ang sabi ni Juan, ang batas daw ay ginagawa

“For the good of the people” ang inaadhika

Nang ang “Oil Deregulation Law”, sa kongreso’y ipunla

Ang layunin daw nito, ang oil price po’y mapababa

“Buwagin ang monopolyo”, isa pa rin sa dahilan

Kaya itong batas, agad nilang sinusugan

Pagpasok po ng “new player” ang inaasahan

Na tatapat sa “three giant, at langis ang kalakal

Ngunit hindi nga po, ganito ang naging bunga

Sa halip na mapababa, ang oil price ay tumaas pa

Ang mga new player, hindi naman kumakasa

At sa awiting “up, up and away” sila rin po’y nakikanta

Ang Shell, Petron at ang Caltex, ang siyang kumukumpas

Sa pagtaas at pagbaba, sumusunod po ang lahat

Apektadong transport sector, strike lagi ang pantapat

Kaya pobreng mamamayan, naiipit, sumisinghap

Sa kuwenta ng oil companies tama daw ang presyo nila

At base po sa “world market,” itinakda na halaga

Reklamo ng kumokontra, “over price” daw po at sobra

Kaya hiling ay i-roll back sa presyo na mas mababa

Ang DOE na “inutil” sa “tug of war” na labanan

Nagmamasid, nagbabantay, pero hindi gumagalaw

Sa katwirang ang langis daw isang uri ng kalakal

Na “deregulate” na po, kaya “tali mga kamay”

Sa lumipas na dekadang ang batas ay umiiral

Nakita po ng malinaw, itong naging kabiguan

Sa halip na makatugon sa hirap ng mamamayan

Ito pa po ang nagsilbing, tila “krus na pinapasan”

Ang tunay na nakinabang, negosyante po ng langis

Na kaya pong “magpa-ikot,” para ito ay kontrolin

Dahil deregulate nga po, ‘di na sila masasaling

Batas mismo na ginawa, “kalasag” nila at “patalim”

Ang sabi ni Juan, ang korte po’t mambabatas

Ang dapat ay umaaksiyon, para ito’y bigyang wakas

Oil Deregulation Law natin, amyendahan o i-repeal

Dahil ito’y isang “monster” na sa tao’y mapaniil

Malayang Isip

Dimasalang, Philippines

August 31, 2011