Abra Kadabra… Maglaho ka!

Ang Sabi ni Juan:

Abra Kadabra… Maglaho ka!

Ang sabi ni Juan, dapat daw ay noon pa

Si Commissioner Alvarez, sa puwesto ay sinipa

Sa libo-libong container van na bigla raw nawala

Wala po sigurong sa kanya ay matutuwa

Sa katuwiran ni Alvarez na hindi raw niya alam

Si Juan ay napaismid, tumaas lang itong kilay

Lalo na nang sabihin n’yang, siya pa raw ang nagbulgar

At meron na ring mga tao, na kanyang kinasuhan

Ang wika ni Mandy, mahirap daw paniwalaang,

sa nangyaring salamangka, pinuno’y nagising na lang

Bilang Custom Commissioner, siya po dapat ang putukan

Kung siya ma’y naging tanga, wala tayong pakialam

Ang labis pong umintriga, kay Juan na isipan

Ang dami po ng nawala, halos umabot sa two thousand

Kung ito ay isa lamang o sampu na pag binilang

Baka daw po pumuwede pa’t, maaaring kalimutan

Komento ni Kiko, sa Custom daw nagpupugad

Tiwaling opisyales, mga taong mapag-hangad

Daang tuwid daw ni PNoy, kanila lang "ini-snub"

Palusot dito, palusot doon, ang inaatupag

Kapag dito nanungkulan, ‘di raw puwedeng maging santo

O kaya’y ‘di maulingan, humahawak sa kaldero

Sa Custom daw ay naglisaw, “bumubulong na demonyo”

At ang nais ay ihulog, opisyal na tinutukso

Kaya naman sinalamangka, malalaking container van

“Abra Kadabra… maglaho ka!, ang kanilang inuusal

Sa mahika na ginawa, merong taong "nagsabwatan"

Kaya gobyerno ay nalugi, sa tax sanang babayaran

Ang sabi ni Juan, kung si PNoy ay seryoso

Na lumakad ng tuwid, o dire-diretso

‘Di lang dapat sinisipa ang opisyal na lumiko

Dapat din daw ay kasuhan at hayaang mabilanggo

Malayang Isip

Dimasalang, Philippines

August 30, 2011