Sa Laban ni Donaire

Ang Sabi ni Juan:

Sa Laban ni Donaire

Ang sabi ni Juan, isa pang boksingero

Ang maipagmamalaki nating Pilipino

Bukod po kay Manny, meron tayong Nonito

Sa mundo ng boksing, sumusungkit ng titulo

Mga laban ni Donaire, di gaanong punado

Dahil kay Paquiao raw tayo nakasentro

Ngunit sa pag-akyat n’ya, na unti-unti po

Kanya ring nakuha inaasam na respeto

Si Fernando Montiel, isang Mexicano

Beterano sa record, mahusay na boksingero

Ngunit siya ay nayanig sa lakas ng Pilipino

Sa ikalawang round lamang, siya’y na-TKO

Boksinerong Pinoy likas daw na malalakas

Ngunit ilan lamang, sa kanila ang umangat

Sa pag-eensayo meron daw pong tinatamad

Kulang din sa disiplina, kaya nga raw minamalas

Sa galaw ni Donaire, atin pong makikita

Na hindi lang po lakas, itong kanyang dinadala

Siya daw ay boksingerong, matalino’t mataktika

Na taglay ng mandirigmang, kamao ang sandata

Ang sabi ni Juan, siya raw ay umaasa

Na marami pang Pinoy, sa boksing ay dadakila

May Manny nga at Nonitong, inspirasyo’t halimbawa

Ang kailangan na lamang ay, ibayo pang pagtitiyaga

Malayang Isip

Dimasalang, Philippines

February 20, 2011