Mata ng Bayan

Ang Sabi ni Juan:

Mata ng Bayan

COA (Commission or Audit?)

Ang sabi ni Juan, ang corruption ay talamak

Dahil merong mga tao, na dito ay kasapakat

Ang AFP, isa lamang sa dami ng nagnanaknak

Na tanggapan sa gobyernong salapi ang kinakawat

Ngayon ay nagmamasid, sa COA na taga-audit

Mata ng taong baya’y may hinalang nakaukit

Sa paglantad nga ni Heidi, marami ang nag-iisip

Kung ang COA ay malinis, o nakalublob sa putik

Ang atin pong COA ang siyang nag-a-audit

Sa mga transaksiyones na meron pong sabit

Ang pondo po sa gobyernong, tiwali na ginamit

Sila ang taga-buking, sa opisyal na nangungupit

Ngunit sa “sistema”, ang auditor ay “kasabwat”

Sa milyones na komisyon, na kanila pong tinatanggap

Hindi na po magtataka, kung hindi sila nalilipat

Dahil sila ay bahagi, sa nakawang nagaganap

Sino raw pong mag-a-audit sa ‘ting COA auditor?

Tanong ng pilosopong, sa isyu’y nagmo-monitor

Kung sila pong ating “MATA”, hindi na rin nagpa-function

Para silang Ombusdman ding, sa sulok lang umaamoy

Ang sabi ni Juan, ang ganito raw empleado

Na sa atin naglilingkod, pero tayo’y niloloko

Kung may “karmang” mahuhulog, sana’y silang makasalo

Tadhana na ang gumanti, sila rin ay maperhuwisyo

Malayang Isip

Dimasalang, Philippines

February 22, 2010