Taguang Ping

Ang Sabi ni Juan:

Taguang Ping

Ang sabi ni Juan, natapos din ang taguan

Sa paglutang ni Ping, sa airport ng Mactan

Ito’y indikasyong humupa na ang laban

Na kanyang binuno sa taong nagdaan

“Never get caught” ang kanya pong motto

Na nakita po nating tila epektibo

Habang lumalaban, siya po’y nagtatago

At lumantad lamang nang siya’y maabsuwelto

May mga nagsasabing, si Ping daw ay duwag

Harapin ang kaso n’yang sa kanya’y inilatag

Ngunit pinili n’yang huwag munang lumantad

Sa kawalan ng tiwala, sa gobyernong alagad

Ito raw po ba ay tama? Tanong ng katoto.

Sa inyong abang lingkod na nagkokomento

Ang sagot ni Juan, ito’y depende po

Sa isang sitwasyon, o kay Ping na motibo

Si Senator Lacson, kritiko ni Gloria

At naging kaaway po ng kanyang asawa

Sa panahon ni GMA, siya po ang reyna

At maraming alagad, alipores po niya

Dahil naliligid ng mga kaaway

At siya’y nag-iisa sa gitna ng laban

Nang “warrant of arrest” kanyang matunugan

Agad na pong nag-retreat, naghanap ng taguan

Dalawang uri raw po ang sabi ni Juan

Ang taong sa giyera’y nakikipaglaban

Ang una po’y lantad kung makipag-tagisan

Ikalawa’y nakatago, tipong gerilyang nagmamanman

Sa kaso raw ni Ping, mas pinili ang ikalawa

Dahil palagay n’ya di raw pantay ang hustisya

Kung siya’y makukulong, kaaway ay matutuwa

Tagilid rin ang lagay n’ya, kahit siya ay ngumawa

Ipinagkait din daw ni Ping, kasiyahan ni Arroyo

Na siya ay makulong bago matapos ang termino

Isa itong "strategy," kay Juan daw na pagkuro

Ng mandirigmang lumalaban, habang siya’y nakatago

Ang punto ng katotong, nakikipag-argumento

At nagsasabing itong si Ping, sa laban ay tumatakbo

Kung inosente raw siya, harapin daw itong kaso

At lumaban ng lantad, huwag daw maging tuso

Ang tugon ni Juan, hindi siya nakikipagtalo

Sa katotong nakausap, na isa rin pong maginoo

Ito ay opinyon niya, at sariling kuru-kuro

Na hindi masasaklaw, kumokontra po dito

Ang sabi lang ni Juan, ang isa raw kabalyero

Sa pakikipag-hamok, may “bobo’t matalino”

Ang lantad ay nasasawi, naliligtas ang nagtago

Kung alin dito si Ping, kayo na raw ang magkuro

Malayang Isip

Dimasalang, Philippines

March 28, 2011