What If...

Ang Sabi ni Juan:

What if…

Ang sabi ni Juan, gaano tayo kahanda

Sa pagdating nang disaster na sa ati’y nagbabanta?

Ang pagtugon ng gobyerno sa masasalanta

Gaano rin daw kabilis na isasagawa?

Noong tayo’y ma-Ondoy, maraming 'di nakahuma

Sa Marikina’y biglang taas, ang tubig po ay bumaha

Naging sanhi nga po nito, malawak ang napinsala

Sa buhay at pag-aari, marami rin ang nawala

Ang lokal na pamahalaan, hindi raw po kinaya

Pagtugon sa emergency, wala agad na nagawa

Gobyerno natin noon, tumunganga po muna

Sa kawalan din ng plano, ‘di ito nakahanda

Kung sa bagyong dumarating, ‘di po tayo makaporma

What if…lindol ang yumanig at ang lupa ay bumuka?

Ilang libong mamamayan, ang dito ay mapipisa

Sa debris na dadagan po, mga tao ang kawawa

Nangyari sa Japan, dapat daw nating ikamulat

Na ang lindol ay panganib, at lahat ay hinahamak

Hindi lang po mga building ang dito ay ibabagsak

“Tsunami” sa karagatan, sa baybayi’y itutulak

Ang payo ni Juan, sa atin pong gobyerno

Alisin na raw sana, ugaling reaksiyunaryo

Kapag may naganap na, saka lamang umaakto

Isang asal na masama, ng sa ati’y namumuno

Ngayon pa lang ay mag-plano, mga tao’y i-alerto

Turuan ng tamang gawi sa pagdating ng delubyo

Sa ganitong paalala, mamumulat daw ang tao

At pinsala’y ‘di lalaki, kokonti rin ang perhuwisyo

Sa natural calamity, walang puwede na pumigil

At anumang paghahanda, hindi ito masusupil

Ang sabi ni Juan, tayo raw po’y manalangin

At ang awa ng Diyos AMA, taos puso nating hingin

Malayang Isip

Dimasalang, Philippines

March 16, 2011