Maskara

Maskara

(A tribute to comedy king Dolphy)

Maskara kang, laging nakatawa

Mga tao’y inaliw mo't, iyong pinasaya

Maskara kang pinanood ng ilang dekada

Sa entabladong ginalawan, pinapawi mo ang dusa

Bagamat kung minsan

may luha rin sa ‘yong mata

Lalo’t dinaratnan ng mga trahedya

Problema sa pamilya’t

‘di maiwasang intriga

Ganoon pa ma’y ikinubli mo’t itinago

ang lungkot sa iyong puso

Nariyan ka pa ri’t

mga tao’y sinusuyo

Kahit na damdamin mo’t kalooba’y nagdurugo

Sa halakhak at pag-ngiti,

‘di mabakas ang siphayo

Ngayon ay nagluluksa sa iyong pagyao

O, maskarang labis na dinakila

Sa entablado nitong buhay

alaala mo’y ‘di papanaw

Lumipas man ang panahon.

Dumating ang bagong sibol

Maskara mo’y ‘di kukupas

at ang iyong anino

hindi kailanman magwawakas

Arman T. Francisco

City of San Jose Del Monte, Bulacan

July 11, 2012

What if? (Part 2)

Ang Sabi ni Juan:

What If?

“It only takes one weak link to break the chain.

It only takes one careless flame to start a holocaust”

Ang sabi ni Juan, marami raw siyang “what if?

At scenario na nakikita’t naglalaro sa kanyang isip,

Tension sa Scarborough Shoal na napakaliit,

Posible daw na pagmulan ng malaking conflict

What if…

Ang lider ng Tsina, is so “mayabang”

At ang nasa utak niya, dambuhala s’ya’t tayo’y langgam

Na kung sakaling magkadigma’t, magkaroon ng labanan

Marami at malalakas, armas nila sa sisidlan

What if…

Ang lider ng Tsina, is so arrogant?

And the rules and UN laws, kanilang tinalikdan

Diplomatic at mapayapang negotiation, ibinasura lamang

At mas piniling makidigma’t, mamuwersa ng kalaban

What if…

Ang lider ng Tsina, nakipag-alyado

Sa malaki ring bansa na kagaya niya ay palalo

Sa pag-aakalang mas lalakas, puwersa nila ‘pag nagsalo

At kaya nang manlupig, at sa digmaa’y mananalo

What if…

Ang lider ng Tsina, may topak na’t nababaliw

Peaceful solution to the conflict, no longer possible for him

Ang gusto niya ay digmaan, dahil siya nga ay insane

At wala ng pakialam sa katuwiran at damdamin

What if…

Ang lider ng Tsina, have the mentality of Hitler?

Na sa sobrang pagkapalalo, sa kanyang hawak na power

Kapitbahay na mga bansa, he wanted to conquer

And annihilate the citizen in their own land and lair

What if…

Ang lider ng Tsina, forgot the lesson in history?

Na ambisyosong "head of State" ang siyang naging sanhi

Kaya nawasak ang civilization, milyon-milyon ang nasawi

Sa digmaang “no victorious” o walang nagwawagi

What if..

Ang lider ng Tsina, forgot how destructive it is?

The stockpile of weapons, na posibleng magamit

Mga nuclear bomb po itong, kapag sa ere’y pinasirit

Buong mundo’y mawawasak, mga lahi’y mapapalis

Ang sabi ni Juan, ang solusyon daw po dito

Ay “power of prayer” sa Diyos tayo magsumamo

Head of the State na nag-uusap, maging mahinahon ang ulo

Upang kapayapaa’y manatili hindi mawasak ating mundo

Malayang Isip

Dimasalang, Philippines

April 22, 2012

Alamat ng Bunging Langgam

Ang Sabi ni Juan:

Alamat ng Bunging Langgam

Ang sabi ni Juan, na matagal nagpahinga

Sa pagsulat ng tulang may pilantik at patama

Ang kanyang topic ngayon pambu-bully ng China

Sa bansang ga-langgam lang kumpara sa kanya

Sa ating world history, ‘di na raw ito bago

Na may mga bansang mayayabang at palalo

Lalo’t leader nila, may basbas ang panduduro

Sa nasyong maliliit na tingin nila’y luno

Ito’y walang pinag-iba sa halimbawa ni Mandy

Na noong bata siya’y batuk-batukan palagi

Alagang buskahin ng batang malalaki

Kaya kapag siya’y na-bully, sa sulok lang humihikbi

Dito niya naisip na katawa’y palakasin

At ang kanyang skill, dagdagan at paunlarin

Gusto niyang makatiyak na kapag s’ya’y sinaling

Nang-aaaping malalaki, kanya ring “mapupuwing”

Wala s’yang layunin na makipag-basagulo

O kaya’y maghiganti, o mang –bully ng tao

Ito ay pang-sarili n’ya’t kanya lang paniguro

Na kung siya’y manganganib, ‘di naman siya dehado

Ang epekto raw nito kay Mandy ay nakabuti

Dahil tikwas na timbangan, medyo raw po nabalanse

Mga taong dati-rati’y sa kanya ay nangbu-bully

Bigla raw pong nanahimik, maingat na’t nagsusuri

Ito po ang sa ngayo’y sa Pilipinas na katayuan

Sa pambu-bully ng China, alam nilang sila’y lamang

Iniisip na po nilang, puwede tayong tapakan

Na hindi manganganib dahil “bungi” tayong langgam

Ngunit kung noon pang si “Uncle Sam” ay umalis

At namuno sa ati’y mataman po na nag-isip

“Modernization” ng AFP, agad-agad pinasirit

Siguro po’y walang bully na sa atin ay lalapit

Ngunit dahil sa alam pong tayo’y walang kakayahan

At ang ating mga barko, iilan lang at “second hand”

“Tirador” po kontra “missile” na palama’y bombang nuclear

Ang atin bang itatapat, sa pakikipaglaban?

Sa kasaysayan ng mundo, dapat tayo ay natuto

Na ang “mahihina” ang target ng mga pag-abuso

Kapag higante’y pinag-bigyan sa bakura’y yumapak po

Tiyak na ring isusunod, bahay na pong isusubo

Kung aasa po tayo sa kaibiga’t kapitbahay

Na tutulong kapag tayo’y pinasok na’t pinapatay

Paano na kung sila raw, maghalukipkip lang ng kamay

At pangako sa tratado, binale-wala na po lamang?

Magpalakas at mag-armas, ‘di dapat na isa-isan' tabi

Ang sabi ni Juan sa sector na mapag-suri

Ito’y isa sa tungkulin ng bansang “merong puri”

Upang sa gitna ng panganib, maidepensa ang sarili.

Malayang Isip

Dimasalang, Philippines

April 20, 2012

Impeachment Effect

Ang Sabi ni Juan:

Impeachment Effect

Ang sabi ni Juan, si Mandy ay nagkuwento

Habang ito raw po, nasa lugar ng trabaho

Sa kanilang lunch break, may dalawang empleado

Ang muntik nang magsapakan habang sila'y nagtatalo

Ang kanilang isyu't, dahilan ng argumento

Pag-“inhibit” ni Drilon bilang judge sa senado

Sa bintang na kampi ito sa prosecutor na kabalyero

Kaya bilang hukom, disqualified daw po ito

Ito ay kinontra ng co-employee na kausap

At sinabing ang depensa'y, naghahanap lang ng butas

Karapatan daw ni Drilon ang magtanong at mangusap

Bilang “clarification” sa katotohanang hinahanap

Kung ang clerk of court ay "pumiyok" 'di raw nito kasalanan

At amining itong SALN, nasa kanyang mga kamay

Ito raw po'y isang “karma”, kay Coronang kamalasan

Na mabisto't, mailantad, nakatagong kayamanan

Habang tumatagal raw ang kanilang sagutan

Ang volume ng mga boses, parang radyo sa pihitan

Kumakain sa kantina't empleado'y naglingunan

Nang ang dalawa’y pumorma na’t humanda sa suntukan

Maiinit nilang ulo, agad namang pinayapa

Nang naroroong co-employees na sa kanila'y pumagitna

Ang dalawang nagtatalo, tila naman napahiya

Tinapos ang tanghaliang, walang imik ni bahagya

Si Mandy na kumakain, at nasa isang sulok

Pangyayari'y itinala sa dala niyang note-book

Ito raw ay isang "effect" ng impeachment na umuusok

Na ngayon ay nagaganap sa senado nating bundok

Ito rin po ay patunay na sa ating kababayan

Marami pang mga taong sa "isyu" ay merong alam

Nangyayaring impeachment daw hindi man "lamang tiyan"

"Lamang ulo" raw po ito't pampalawak ng isipan

Ang sabi ni Juan sa kabila raw ng teknolohiya’t

impormasyong sa electronics atin ngayong makukuha

Meron pa ring ilang taong sa isyu ay "nakanganga"

Kaya kapag na-interview walang sagot na mapiga

Maging attentive raw tayo, si Juan ay nagpapayo

Kahit abala sa gawain at kanya-kanyang trabaho

Sa cellphone po na may TV, at earphone nitong radyo

Nangyayari sa impeachment maa-update pa rin tayo

Ito rin daw ay bahagi ng ating kasaysayan

Na sa henerasyong ito, saksi tayong mamamayan

Kapag daw po ating apo, nagtanong sa kaganapan

Tayo raw na matatanda, isasagot ay malinaw

Malayang Isip

Dimasalang, Philippines

January 24,2012

A Knight's Tale

Ang Sabi ni Juan:

A Knight’s Tale

Ang sabi ni Juan kanya raw naalala

Ang knight na si Lancelot ng “bilog na mesa”

Sa katapangan at husay, siya ang nangunguna

Kumpara sa kabalyerong nakalaban na niya

Ngunit nang maging misyon ng mga kabalyero

“Banal na Kalis” ay hanapin sa malayong dako

Ang magiting na kabalyero umuwing isang bigo

Dahil hindi po dalisay pagkatao niya’t puso

Lihim siyang umibig sa magandang reyna

Na kinaulayaw niya sa “bawal na pagsinta”

Ang naging bunga nito, paglalaban at trahedya

Na nagwasak at humati sa bilog na mesa

Ang “knight’s tale”, na ito, kay Mandy na komento

Isa lamang kathang isip, pero magandang kuwento

Sa sangkap na “moral lesson” atin daw pong matatanto

Na sa “kalinisan ng kanyang puso” sinusukat ang tao

Sa bansang Pilipinas, meron ngayong kabalyero

Sir Corona ang pangalan at Supreme Court ang kastilyo

Siya ay mandirigma ring sa “batas” ay eksperto

At nakikipag-hamok ngayon sa arena ng Senado

Siya ay nililitis nang dahil sa isang reyna

Ang bintang ay “protector” ng queen pong nagkasala

Sa labing-siyam n’yang desisyon, consistent daw na nakikita

Na “bias” s’ya at pumabor sa reyna pong nakulong na

Nakasalang din s’ya ngayon sa matinding pagsubok

Knight solon na kalaban, armado ng mga “bulok”

Ito ay hinalukay pa sa basurang umuusok

Na dati po’y nakatago pero ngayon ay sinalok

Sa pag-salag ni Corona, dito natin maaarok

Kung sa “golden chair” niya dapat nga siyang nakaluklok

Kapag siya ay napaso sa lance nilang itutumbok

Siya ay matutulad sa kabalyerong si Lancelot

Ang sabi ni Juan na sa impeachment ay miron

Ang upuan sa Supreme Court hindi dapat “nabababoy”

Ang payo niya sa Senators na dito ay maghahatol

Kabalyerong si “Galahad” ang gawin n’yong base’t sampol

Malayang Isip

 Bulacan

Jan 16, 2011

It’s More Fun in the Philippines

Ang Sabi ni Juan:

It’s More Fun in the Philippines

Ang sabi ni Juan, sa napipintong bakbakan

At “Impeachment Battle” niyang binansagan

Magkabilang kampo panay na ang kanyunan

At bombang “accusation” ang pinalulutang

“Knight Solon” ni PNoy “condo bomb” ang ibinato

Sa kampo ni Corona na may tinik sa ulo

Ito raw ay ebidensiyang ang chief na mahistrado

Nagpayaman sa tungkulin at posisyo’y inabuso

Mga “Senator Judges” na dito ay taga-hatol

Agad namang pumagitna sa bomba na ipinukol

At ang sabi: “Ito’y duwelong sa sixteen pa itutuloy”

Kaya rules ay nilalabag ng kongresistang prosecutor

Dahil dito’y natameme, knight solon ng palasyo

Kahit sila, sa katwiran, hindi naman kumbinsido

Ang hinukay nilang “time bomb”, itinabi’t, itinago

At oras ay ini-reset, sa disi-sais ng Enero

Abugado ni Corona, meron namang pinasingaw

Ang senator judges daw isa-isang “ginagapang”

Kay Haring PNoy ng palasyo naka-ukol ang paratang

Upang makasiguro raw na si Renato’y mahatulan

Meron ding nagnanais, atensiyon ay iligaw

Sa condo unit ni Corona’ng una nang inilitaw

Si Justice Carpio ng Supreme Court ang pinagbalingan

At ang condo naman nito ang siyang napag-tripan

Habang ito’y nagaganap patuloy na kumikilos

Ang “dalawang itlog” na nagkakanda-kumahog

Sila po’y abugado ring tila utak ay nakalog

At proseso ng impeachment, ninanais na ihulog

Sa “last minute” humirit pa, nagpetisyon ang dalawa

Na karagdagan sa petisyong nakahain na at nauna

Ang dalawang itlog na ito, sa Supreme Court ay umaasa

Na desisyo’y ibababa, pabor po sa chief nila

Ang wika ni Mandy, kanya raw pong nakikita

Na proseso ay matutuloy, tadhana ang magdidikta

Ang duwelo ay “pagdalisay” kay Renato Corona

Dito natin malalaman, kung siya ay ginto nga

Sa dalawang ito, ang payo ni Juan

Panoorin na lamang, Impeachement Battle na labanan

Natitiyak niyang sa gitna ng tunggalian

“It’s more fun in the Philippines,” ang kanilang mauusal

Malayang Isip

Dimasalang, Philippines

Enero 12, 2011

Pangitain at Dalangin

Ang Sabi ni Juan:

Pangitain at Dalangin

Sa taong twenty-twelve, ang sabi ni Juan

Marami raw “scenario” siyang natatanaw

Ang iba raw dito sigurado nang lulutang

At bubulaga po sa tao, sa Enero pa lamang

Sa ating gobyerno patuloy ang tunggalian

Executive, legislative vs. kataas-taasang hukuman

Si Pnoy at Corona na girian ng girian

Tampok sa “political chess game” na pinaglalabanan

Habang sila’y naghahamok, mga "buwayang negosyante"

Na sa puso’y “kasakiman” lubhang naghahari

Pagtataas po ng presyo na palaging minimithi

Ay malamang na matupad at ito ang mangyari

Opisyales ng gobyernong “in-charge” sa regulation

At ang function at mag-review sa presyo na ipapatong

Asahan ding basbas nila sa “capitalist” po papabor

At hindi sa “consumer” na panay lang ang panaghoy

Tiwali at mga “corrupt” na nasa gobyerno

Na ngayon ay “alipores” ni Haring Aquino

Patuloy na maghahanap ng daang papaliko

Kung saan manunungkit ng milyon-milyong piso

Mga "pulitiko" sa twenty-thirteen na nakatanaw

Sa taong ito tiyak, magsisimula na manliligaw

Mamamaya’y "bobolahin" at magpapa-istaran

Sari-sari ring pakulo ang maaasahan

Sa kabilang dako, "unos" din ay nagbabanta

Na posibleng sa twenty-twelve muling manalanta

Kung ang tao at gobyerno sa pansitan tutunganga

Baka "delubyo" ay maulit kung hindi maghahanda

Ang mga “rapist” naman ng likas nating yaman

Na “taga-kutkot” at “taga-panot” ng ating kabundukan

Operasyon ay tuloy-tuloy sa sandaling malingatan

At naganap na trahedya, kalmado na’t nalimutan

Sa kabila ng “negative” na kanila raw nakikita

Si Mandy at si Juan, patuloy na umaasa

Ang DIYOS na Lumikha, patnubayan daw sana

Ang mga mamamayang may pananampalataya

Nawa’y pagaanin NIYA ang buhay ng tao

Naapi at nagdurusa’y haplusin din itong puso

Ang mga nabuwal na’t labis na nasiphayo

Ibalikwas at itindig, tulungan na makatayo

Naghaharing mga “ganid”, mga taong palalo

Mga mapang-api’t sa aba ay berdugo

Silang mga “taksil” na sa tiwala’y nagkanulo

Hatulan na rin sana, at sa mundo ay maglaho

Dalangin din ni Juan sa DIYOS na Lumikha

Ang taong twenty-twelve raw sana ay maging "mabiyaya"

Maka-iwas sa trahedya at buhay ay lumigaya

Maghari po ang “pag-ibig” at damdami’y pumayapa

Malayang Isip

Dimasalang, Philippines

December 30, 2011