The Defiance

Ang Sabi ni Juan:

Part 2: The Defiance

Ang sabi ni Juan, hindi raw po nagkabula

Ang kanyang sinabi sa naunang kabanata

Korte Suprema po natin, TRO ay ibinaba

Si Aling Gloria po, pinayagang mangibang bansa

Sa desisyon ito, si GMA ay tuwang-tuwa

Agad-agad na nagbalot, sa pag-alis ay humanda

Sa layuning maka-iwas sa check-mate na nakaamba

At makahingi ng asylum, sa pupuntahang bansa

Ngunit naunsiyami, una niyang pagtatangka

Hindi siya nakalabas, sa St. Luke muna naglungga

Ang “watch list order” po kasi ni Secretary De Lima

Patuloy na epektibo, kahit TRO ay meron na

Dahil nga po dito marami ang namangha

Ang DOJ Secretary, Supreme Court ang binangga

Sa tapang at tatag niya, marami rin ang humanga

Sa ‘di n’ya pagsunod, sa TRO na ibinaba

Mga legal luminaries, may kanya-kanyang opinion

At si Aling Laila po, naging subject sa diskusyon

Bilang abugada at sa batas ay may leksiyon

Alam daw po nito, ang magiging sitwasyon

Supreme Court ang interpreter sa batas na inihain

Desisyon ng majority ang may timbang para sundin

Sa pagsuway ni De Lima, mga tao’y nag-isip din

Moog ditong nag-umpugan, “PNoy Rook” po’t “Tower ng Queen”

Komento ng iba, contempt daw po ang katapat

Na posibleng maipataw sa sekretaryang sumalungat

May senadora rin pong, ibig na raw na mag-suicide

At nagsabing tila siya’y wala na sa reyalidad

Ang pawn po ni PNoy na si Laila De Lima

Nanatiling nakaharang, patuloy po sa pag-kontra

Dahil dito’y sa ospital si GMA, namahinga

Pinalipas ang araw na mga doctor ang kasama

Habang sila’y nag-iisip, sa sulong na ititira

Ang Solgen ni PNoy, MR po ay ikinasa

Sa layuning mapigil po, pagpuga ng dating reyna’t

Maiwasang ang chess game po, mabitin o magtabla

Ang sabi ni Juan, Supreme Court po ay nagtakda

Na MR po’y talakayin, na sa TRO ay sisira

Mga tao’y mag-aabang sa susunod na kabanata

At part three po nitong sagang, sa blog ni Juan itatala

Malayang Isip

Dimasalang, Philippines

November 17, 2011