Kolektor ng Bayan

Ang Sabi ni Juan:

Kolektor ng Bayan

Ang sabi ni Juan, sa bawat sangay ng gobyerno

May nakatokang opisyales, na dito ay namumuno

May role din po silang, dapat ay ginagawa po

Base sa tungkulin na, kanilang inaako

Ang COA po natin ang “Mata ng bayan”

Taga-audit ng transaksiyon, kung may katiwalian

Ang “Aso ng bayan” ito naman ang Ombusdman

Na dapat umusig sa opisyal na kawatan

Meron din po tayong, “Kolektor ng Bayan”

BIR na taga-likom, sa buwis ng pamahalaan

Trabaho po nila’y importanteng tunay

Upang ang gobyerno, patuloy na mabuhay

May target po silang lilikuming halaga

Na kung minsa’y naaabot, o kaya ay sobra pa

Pero may sandaling ito rin po’y bumababa

Dahil kinukulang, kanilang nakolekta

Nang si Kim Henares, sa BIR ay maupo

Tila astig daw ang dating, at seryosong mamuno

Agad napabalitang may negosyanteng tuso

Na kanila raw kakasuhan at hindi sila nagbibiro

Isa na daw si Juan sa mga natuwa

Dahil malalantad na ang mga timawa

Ang mga negosyanteng, sa tubo’y nagpasasa

Masisingil na rin, ang mga buwis na sinuba

Kasama na dito, tinutugis na rin nila

Mga kinasuhang heneral na nagsamantala

Daang milyon na dinambong, sa kabang bayan na pera

Na nararapat maisoli kahit bahagi sa natira

Ang payo ni Juan, linisin din daw ang bakod

Ang bahay ay pagpagin, tirisin ang mga “uod”

Sa BIR daw kasi, may tao ring nasasangkot

Kaya target nilang buwis, kung minsan ay kinakapos

Alamin din daw natin, kung may mapo-prosecute

Sa taong kinasuha’t sa buwis ay nagdamot

Baka raw sa press release, magaling lang na manakot

Pero sa bandang huli, BIR din ang lalambot

Ang sabi ni Juan, ituloy ang “paninilip”

Upang makakita ng marami pang suwitik

Si Juan daw ay sasaludo kay Mrs. Henares

Kung may tapang nga siyang, tax evader ay mawalis

Malayang Isip

Dimasalang, Philippines

March 25 , 2011