Pulitika at Relihiyon

Ang Sabi ni Juan:

Pulitika at Relihiyon

Ang sabi ni Juan, sa mundo ng pulitika

Marami raw itong anyo, na atin pong makikita

Gumagalaw dito, hindi lamang isang mukha

Nakasuot ng maskara, nagpapalit, nag-iiba

Sa isyung impeachment, ang mga kongresista

Tila artistang gumaganap sa isang sarsuwela

Sa gobyerno ni Gloria, sila noon ang nagbida

Sa panahon po ni P-Noy, ang role nila’y kontrabida

Ang bayan po ay nanood sa kanilang drama

“Impeach Mercy” ang titulo na ginanap sa kamara

Sa debate at botohan ng atin pong kongresista

Itong si Juan ay nakinig, sa isyu’y nag-analisa

Opposition representative, tumindig po sa debate

Si Syjuco’y namersonal, si Tupas ang inatake

Si Lagman ay pumosisyon, tila manok na gumire

Hinimay ang mga puntong sa impeachment nakabase

Si Farinas ang sumalag na animo kabalyero

Parang teksas tumilaok, na hindi po patatalo

Mga hataw po ni Lagman, na paroo’t parito

Sa botohan din nauwi nang siya ay huminto

Dos siyentos dose po ang nakuhang boto

Na ma-impeach si Gutierrez, sa posisyon nito

Kuwarenta’y sais naman, nagsabing sila ay “no”

At apat din ang nag-abstain, o hindi po bumoto

Si Congresswoman GMA, natural lang na kumontra

Kasama ang “alipores” na loyal pa rin sa kanya

Ang subject ng impeachment, dating “alaga” po niya

At ka-klase ng ginoong, asawa ng dating reyna

Sa two hundred twelve raw po, tiyak na may bumaliktad

Sa tawag ng “pork barrel” na kanilang hinahangad

Ang ilan ay nakiisa sa botong “yes” nakitulad

Sa takot na ang pangalan, “bumaho” po pag nalantad

Ang boto ng iba, “konsensiya” raw ang nagdikta

Na si Gutirrez nga po, totoong nagpabaya

Sa tungkuling sinumpaan, si Mercy ay tumunganga

Kaya dapat na ma-impeach at sa puwesto ay masipa

May “relihiyon” din po dito na sabi ay nakialam

Kongresista na boboto, kanila raw inimpluwensiyahan

Isang “tsismis” na ‘di alam kung sino ang nagpalutang

Kung totoo o hindi man, wala raw pong alam si Juan

Ang sabi ni Mang Juan, ang relihiyon at pulitika

Ay dalawang mundo na di dapat magkasama

Sa relihiyon, kabanalan at pag-ibig ang adhika

Sa arenang pulitika, pugad daw ng balahura

Kung “kaanib po ng sekta”, ang dito ay “nakisawsaw”

Ang pangalan ng relihiyon, hindi dapat idinamay

Ang opinyong pansarili, ay dapat na ihiwalay

Lalo na at pulitika ang kanilang hinihimay

Ang sabi ni Juan kanyang, naging panuntunan

‘Di tumalakay ng relihiyon, o ito kaya’y pag-usapan

Sa isyu pong political, ang involved po ay ang bayan

Sa relihiyon ay ang Diyos, at ang ating kaligtasan

Malayang Isip

Dimasalang, Philippines

March 22, 2011