PNoy Leadership

Debate nina Kiko at Malaya:

PNoy Leadership

Ang sabi ni Juan, wala siyang kakampihan

Sa magdedebateng kapwa niya “kabarilan”

Siya ay papagitna’t makikinig lamang

At bahalang humatol mga taong bayan

Sa ratsada ni Malaya, nawala ang kanyang bilib

Sa ating Presidente, na mahilig mag-adlib

Kanyang obserbasyon, madalas nitong bukang-bibig

Isa lamang “lip service” at tipong pampa-astig

Iba raw ang sinasabi sa kanyang ginagawa

At magaling lamang kapag ngumangawa

Ang asal daw na ito hindi kaaya-aya

Na kanyang nakita na, sa gobyernong mga luma

Ang hirit ni Kiko sa panig ni Pinoy

‘Di raw dapat na agad si Malaya ay humatol

Ang gobyerno nating ito, mag-iisa pa lang taon

Huwag daw madaliin, bigyan ng pagkakataon

Sinasabi ni PNoy, tinutupad daw po nito

Katulad ng “wangwang” na ‘di nito inabuso

Paghabol sa corrupt ng kanyang gobyerno

Hinahawi na ang landas na patungo dito

Ang banat ni Malaya wala pang tunay na pinutol

Ang "palakol" ni PNoy na bigla raw "pumurol"

Ang angas daw nitong merong ulo na gugulong

Tila si Frisco Nilo pa lang pinatikim ng sampol

Nang si Diokno ay mag-resign, hindi niya pinalakol

Kaya ‘di raw ito counted, na ulo ay pinagulong

Katunaya’y inalo pa ni Pangulong Noynoy

At possible pa raw matalaga sa ibang posisyon

Ang salag ni Kiko si PNoy ay hindi corrupt

Sensitibo sa tungkuli’t inaako na ang lahat

Ang ganito daw Presidente ang karapat-dapat

Na gumiya sa gobyernong matuwid ang tinatahak

Hindi raw masama magkaroon ng mga “buddy”

Na “ka-klase”, “kaibigan” at “kabarilan”, ng Presidente

Si PNoy daw ay tao ring ordinaryo ang ugali

Kaya ‘di dapat personalin at sa kanya ay mamuhi

Ang ulos ni Malaya, si PNoy ay may ugali

Na tanda ng kahinaa’t, "leadership" ay mauuri

Kaibigan daw nito’t pumapalpak na mga buddy

‘Di n’ya kayang mapatalsik sa halip ay pinupuri

Hindi siya magtataka kung kay PNoy na gabinete

Magkaroon ng disgusto, umiral daw ang rivalry

Resignation ni De Jesus sa ating DOTC

Ganito po ang scenario, sinisilip ng marami

Sa tinuran ni Malaya si Kiko ay natigilan

Habang ito’y nagmumuni, napailing na po lamang

Nang siya ay ngumiti sabay lahad nitong kamay

Bilang tandang ang debate kanya munang tutuldukan

Pagkatapos ng argumento, si Juan ay nag- epilogue

Senyales na ang diskusyon dito muna tinatapos

Nagkasundo ang dalawang sila muna’y matutulog

Aabangan daw ang SONA, saka na raw babatikos

Ang sabi ni Juan dapat tayong makialam

Sa isyu na nababasa’t napag-uusapan

Tayong lahat ay bahagi ng lipunang umiiral

At ‘di angkop na tumanga’t parang batang walang malay

Mlayang Isip

Dimasalang, Bulacan

June 22, 2011