The Queen's Pawn

Ang Sabi ni Juan:

The Queen’s Pawn

Ang sabi ni Juan, noon pa niya hinulaan

Na si Aling Merceditas sa posisyon ay bibitaw

Ang kanya pong tindig na noo’y palaban daw

Sa sarili niyang kuro, kunya-kunyarian lamang

Kaya nang mabalita, si Gutierrez ay nag-resign

Itong si Mang Juan, napa-smile na lamang

Ang mga nabigo pong, impeachment ay matunghayan

Labang Paquiao Vs. Mosley, abangan na lamang daw

Ang opinyon po ng bayan ay napakalakas

Baraha ni Gutierrez, wala na ring alas

Kung sakali po kasing, sa laban ay mangangahas

Higit daw na kahihiyan, magiging katumbas

Ang kabutihan daw nito, gobyerno ay nakatipid

Gagastusing pera, sa iba na magagamit

Ang bagong Ombusdman na kay Gutierrez ay papalit

Makauupo na sa puwesto na walang balakid

Ang payo ni Juan sa Ombusdman na uupo

Alikabok ay pagpagin sa kasong ‘di naluluto

Ito ay busisiin, sa Sandigan ay ibuslo

Upang ito’y umusad na’t, mandarambong ay mahoyo

Sa “political chess game” ni PNoy at Gloria

At pagkawala ng “Queen’s Pawn” na protector niya

Nakabawas daw ito kay GMA na depensa

At end game raw po nito, kay GM PNoy nakakilya

Ang sabi ni Juan, iigting pa raw ang labanan

At sa ating pulitika, tuloy-tuloy ang salpukan

Opisyal na malalantad, una ditong mabubuwal

Pero “check mate” po kay GMA, hindi pa rin natatanaw

Malayang Isip

Dimasalang. Philippines

April 29, 2011