EDSA Uno EDSA Dos at Tiwarik Nating Mundo

Ang Sabi ni Juan:

EDSA Uno, EDSA Dos, at Tiwarik Nating Mundo

Ang sabi ni Juan, siya daw ay nalulungkot

Sa pagdiriwang ng EDSA Uno, may nakasimangot

Ang ipinagsisintir daw po ng dito ay nakisangkot

Ang bansa daw po natin, patuloy na nakalugmok

Napatalsik daw po natin sa peaceful revolution

Si Makoy na nag-lider, nang dalawampung taon

Ngunit sa halip pong Pilipinas ay umahon

Lalo pa pong nahulog sa malalim na balon

Mga lider na pumalit, ‘di po yata epektibo

Sa pamamahala nila, tila nagka-gago-gago

Sa panahon ni Cory, naging malamya po

Sa gobyerno ni Fidel, umangat po ng medyo

Nang si Erap na po ang maging pangulo

Nag-EDSA Dos naman, tayong mga Pilipino

Umakyat po si Gloria, sa binakanteng trono

Ngunit ang sumunod, nine years na impiyerno

Habang populasyon po, patuloy na lumolobo

Tumataas ang bilihin, wala din pong ma-trabaho

Mga opisyales po naman sa ating gobyerno

Kurakot dito, kurakot doon ang ginagawa po

Sa panahon ni GMA, nagkawindang-windang

Ang EDSA Dos po niyang ipinagpa-parangalan

Dito po sa corruption, tayong nasa top one

Sistemang nagpatuloy, sa lahat halos ng sangay

Kaakibat po nito, dumami ang nagugutom

Bigas po ay pinilahan ng mga taong nananaghoy

Karampot na kinikita ng ordinaryo pong Pinoy

Sa pag-akyat po ng presyo ‘di na sila makahabol

May mga nagsasabing, demokrasya po natin

Sumobra sa kaluwagan, at nawalan po ng ngipin

Kalayaan ng lider nating, animo isang “kingpin”

“Sistema ng sindikato” ay puwede niyang pairalin

Ngayon po ay nakatuon, ang ating pag-asa

Sa gobyerno ni P-NOY na anak rin po ng EDSA

Sa kanyang pamumuno gumawa sana ng reporma

Na susupil sa tiwaling, ninanasa’y milyong pera

Pagtuunan din daw niya, ang sanhi kung bakit

Ang “power rate” sa Pilipinas, sumasagad na sa langit

Ang bansa daw pong Japan na maunlad ang mga business

Mas mababa pa ang singil sa power na ginagamit

Kung noon ay nagsisikip, ngayon daw ay papahigpit

Ang lubid na nakatali sa leeg ng masang gipit

Kunsintidor na opisyales, na sa puwesto’y nakakapit

Katulong ng negosyanteng ang bayan ang hinahaplit

Ang sabi ni Juan ‘di niya maisip ang lohika

Sa utak ng mga taong sa presyo’y nagmanipula

Sa mundo pong balansiyado malinaw na makikita

Na tayo pong Pilipino, tinatarget lang ng buwaya

Kung gobyerno ni P-NOY, dito’y walang magagawa

At “tiwarik nating mundo” ‘di po niya itatama

Ang sabi po ni Juan, wala na siyang mawiwika

Ang iiwan na lamang niya, kay Mandy na talinghaga

“Ang iyak ng sanggol, na bahagyang ingit

At ‘di pinapansin ang sanhi kung bakit

Sa oras na sila’y humabi ng awit

Asahang palahaw, guguhit ng lintik”

Malayang Isip

Dimasalang, Philippines

February 25, 2011