Sa Mundo ng Facebook

Ang Sabi ni Juan:

Sa Mundo ng Facebook

Ang sabi ni Juan siya raw ay iiskiyerda

At mananahimik kahit pansamantala

‘Di raw siya pipilantik o kaya ay pupuna

Sa isyu na lumulutang, magmamasid daw po muna

Maging dito sa Facebook na binibisita

Ay sisilip na lamang siya nang panaka-naka

Kung meron daw tsansa, ang tweet niya’t talinghaga

Ipoposte pa rin dito’t sa pader ay itatala

Sa maikling panahon daw na siya’y nagpe-facebook

May maganda at pangit s’yang dito ay naarok

Sa social networking totoong may nahu-hook

Pero meron din pong nabibiktima ng crook

Ito rin daw Facebook malaki ang pakinabang

Sa mga impormasyo’t pakikipagtalastasan

Mga taong nagpe-facebook, ito rin ang libangan

Ang ilan ay adik na’t sa computer nakatunghay

Iba’t ibang tao ang dito ri’y makikita

Merong tapat, merong hindi na makikilala

Meron ding mga tuso na inosente ang puntirya

Kaya kadalasan, kawawa po ang biktima

May mga tao ring gamit itong hanap-buhay

Ang kanilang produkto, ipinoposte po lamang

Meron namang hinahanap libo-libong kaibigan

At kaanak na nalayo’t matagal na nawalay

May mga magkaibigan na naging magkaaway

Dahil sa sagutan at komentong ibinigay

May tao ring mapapansin na dito ay nagyayabang

At ang ila’y nagbabanta, naghahamon ng sakitan

Makikita din sa pader, nakasulat na mga bagay

Ang “pagkain”, ang “pag-hikab”, ang “pag-utot” at “pag-dighay”

Ito raw po ay paramdam na nagsulat, gumagalaw

Gayong buong mundo, sa tala n’ya’y nakatunghay

Ang sabi ni Juan, patuloy daw na iinog

Ang buhay ng mga taong, mundo ay itong Facebook

Ang payo lang niya, dapat bigyan ng second look

Ang mga manlolokong dito rin po’y nag-iikot

Malayang Isip

Dimasalang, Philippines

July 2, 2011