De Lima's Dilemma

Ang Sabi ni Juan

De Lima’s Dilemma

Ang sabi ni Juan, siya ay namangha

Sa mga sikretong, sa Bilibid ay lumuwa

Sa loob ng piitan, mga kubol ay ginawa

Parang hotel daw ang silid, nakatira’y mga “tsekwa”

May sariling susi’t kumpleto sa kagamitan

Na animo’y hindi preso, mayayaman na kriminal

Ito ay kinunsinti ng sa BuCor nanungkulan

At naging “kapural” sa sistemang pinairal

Sistema raw ay minana’t nagpasalin-salin

Na hindi itinuwid kahit na po napapansin

Ngayong nahayag na at sila ay nabuking

Imposibleng walang pera na dito ay pinatining

Nag-utos si De Lima, mga kubol ay lansagin

Pero naging sagot, “magra-riot” pag sinaling

Nagbabanta’y mga preso, na sa loob astig pa rin

Sa paglabag sa tuntunin, tila baga mga kingpin

Binawi raw ni De Lima, ang naunang kautusan

Siya raw ba at natakot? Nagtatanong po ay si Juan

Ang order n’yang iniatras, senyales ng karuwagan

At ang responsibility, tila ‘di kayang matugunan

Patakaran daw ng BuCor, sa manual lang nakasulat

Pero ang nilalaman hindi raw po tinutupad

Sarili raw panuntunan, na sa bibig lumalabas

Ang siyang nangyayari’t opisyal ang nagbabasbas

“Only in the Philippines” ang ganito raw tindig

Komentaryo ni Mandy na ang ulo’y pumipilig

Ang dapat daw ibilanggo at itapon sa Bilibid

Opisyales ng tanggapang, sa sistema’y nagpalawig

Ito ngayon ang “dilemma” ni Secretary De Lima

Kung paano gagamutin, ang sa Bilibid ay problema

Ang kanyang babanggain, bilanggo pong kumakasa

Na salapi’y makamandag, nababalot pa ng droga

“Command responsibility”, ito’y dapat n’yang akuin

Gaya po ng sinabi, ng Senador nating si Ping

Sa kanyang opisina, ang BuCor ay nakalimlim

Kapag itlog ay nabugok, dapat siya ang sisihin

Itong ating correctional maliit lang sa tingin

Ngunit itong mukha, tila higanteng salamin

Ang “corruption” po dito, sa ugat na nakatanim

At sa pag-overhaul, dugo na dapat ang sipsipin

Ang payo ni Juan sa babaeng sekretarya

Ang “kamay na bakal”, isuot daw po muna

Umakto raw na lalaki, at may “balls” s’yang dinadala

Ang baluktot ay ituwid at ang mali ay itama

Malayang Isip

Dimasalang, Philippines

June 10, 2011