Face to Face

Ang Sabi ni Juan:

Face to Face

Ang sabi ni Juan, hindi raw po exciting

Ang labang Paquiao-Mosley sa ibabaw ng ring

May mga nabigo ring si Shane ay mag-i-sleeping

Sa suntok po ni Manny na nakakaduling

Sa kanya pong napanood, ang tunay na nangyari

Nang sa ikatlong round, bumagsak si Mosley

Ito po ay natakot at labis na nag-worry

Kaya takbo, yakap, iwas naging strategy

Opinyon ni Juan na nag-aanalisa

‘Di siya kuntento sa boxer na ikinasa

Kung baga sa pagkain, si Mosley ay tira-tira

Na ang layunin lamang, kumita at mamahinga

Sa tatlong huling laban ng Pambansang Kamao

Na palagi namang siya ang nananalo

Ang inaasahan pong laban na mga eksplosibo

Hindi na po nakikita, one sided at walang KO

Sa laban kay Clottey na naging punching bag

Nawala ang excitement sa ginawang puro salag

Kay Margarito naman na mukha ay nabasag

Natapos ang labang hindi rin natibag

Ang kailangan ni Manny boksingerong lumalaban

Na handang sumagupa sa “face to face” na labanan

Dito natin masusukat ang tunay n’yang katangian

Na posibleng yumabong pa at ang husay ay kuminang

Sa mga mandirigmang kay Paquiao ay nakapila

Itong si Mayweather ay mas boring kung umasta

Kapag sila ang naglaban, asahan ng inyong mata

Mapipikit, maiidlip, sayang lang ang inyong pera

Mas mabuting si Marquez, sa kanya ang itapat

Dahil may record po siya na hindi rin umaatras

Bukod dito’y mase-settle ang aklat na walang wakas

At ang bibig ni tukayo, mabubura na ang angas

Ang sabi ni Juan kung gusto nating malaman

Na ang isang tao, ang “da best” sa larangan

Ang dapat daw na iharap at makakasukatan

Iyong da best din pong tao na lalaban ng "sabayan"

Malayang Isip

Dimasalang, Philippines

May 9, 2011