Sa Ikatitipid ng Bayan (Bisikleta ang Kailangan)

Ang Sabi ni Juan

Sa Ikatitipid ng Bayan

(Bisikleta ang Kailangan)

Ang sabi ni Juan, sa isyu ng bisikleta

At kay Miriam Santiago na ipinanunukala

Paglalagay daw ng “bike lane” sa ating karsada

Napapanahong plano na ang epekto ay maganda

Si Juan daw ay sumusuporta pag natuloy ito

Bagamat ang gobyerno tila “reluctant” po dito

Binalak na po dati ang panukalang ganito

Pero nagpatumpik-tumpik mga dating namumuno

Sa panahon ni Bayani, dating MMDA Chairman

Para raw sa bisikleta, karsada ay ginuhitan

Ngunit ito nga po, hindi rin daw nagtagumpay

Dahil ang mga sasakyan, dito pa rin nagdaraan

Aksidenteng may kinalaman, mga motorsiklo

Ay napakarami kung basehan ay porsiyento

Ang sanhi nga po nito, kanilang kahalubilo

Malalaking sasakyan, na paroo’t parito

Kapag dito’y inihalo, maliliit na bisikleta

Ang kawawang mga biker, tiyak pong mapipisa

Kaya kung itong bike lane, ipapanukala

Siguruhin po lamang na hindi sila kawawa

Kung sa version ni Miriam, guhit din ang ilalagay

Sa panukalang bike lane na muling binubuhay

Huwag na lang daw ituloy, dahil ito’y masasayang

At aksaya sa pintura, dahil hindi daraanan

Mungkahi ni Juan, sa bike lane raw ay maglagay

Ng espasyong bisikleta ang tangi lang na daraan

Ito’y dapat na may railings o bangketang nakaharang

Upang hindi madisgrasya ang biker na naglalakbay

Marami raw na advantage, paggamit ng bisikleta

Ito’y isang transportasyong kahit sino’y makakaya

Bukod pa po sa exercise na atin pong magagawa

Mga taong matataba, mantika ay mapipiga

Sa mga obrerong maliliit ang kinikita

Sa mataas na pasahe, kinakapos na po sila

Kung sila ay gagamit ng kanilang bisikleta

Ang matitipid nila dito, gagastusin sa pamilya

Konsumo ng langis, tiyak din daw na bababa

Dahil ibang motorista posible po na gumaya

Mga babae at lalaki, mga bata’t matatanda

Sa ligtas nating bike lane, labis silang matutuwa

Ang sabi ni Juan, sa ikatitipid daw ng bayan

Mga bisikletang sasakyan, ang ating kailangan

Huwag tayong dumepende sa de-langis na sasakyan

Dahil enerhiyang ganito, lalo pa pong magmamahal

Malayang Isip

Dimasalang, Philippines

April 28, 2011