Tatak na Iniwan

Tatak na Iniwan

Sila’y mandirigmang, armas ay panitik

Na isinusulat, sa papel ang hibik

Ang katotohanang, hindi natin batid

Napalalaya nila’t, naisasatinig

Sa kanilang pag-gala, ay walang sandata

Habang kumakalap, ng ibabalita

Sa layuning ipaalam, ang mali sa tama,

Buhay na rin nila, ang itinataya

Bayang niyapakan, pugad ng limatik

At mga demonyo, ang kinakatalik

Hindi nila natantong, labis ang panganib

Na hindi nila dinanas, sa ibang daigdig

Naghahari dito, mga utak tulisan

Na baril at ginto, ang pinagagalaw

Mga alagad nila’y laging, handang pumatay

Kahit mga inosente ito’t, hindi lumalaban

At naganap na nga, kinatatakutan

Mga taong bayan, nagulat, nahambal

Umagos ang dugo, sa lupaing tigang

Sa lalawigang ang ngalan, ay Maguindanao

Mga taon ay lilipas, at magpapaalam

Lagim na naganap, tatak nitong iniwan

Tatlumpung mamamahayag, na nagbuwis ng buhay

Ang nagbigay dilim, sa ating kasaysayan

Malayang Isip

Dimasalang, Philippies
Agosto 10, 2010